Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasına miyneti sińgen jurnalist, Qaraqalpaqstan xalıq jazıwshısı, «El-yurt hurmati» hám «Fidokorona xizmatlari uchun» ordenleriniń iyesi Sharap Usnatdinovtıń 80 jıllıq yubileyine baǵıshlanǵan «Kóp qırlı talant iyesi» atamasındaǵı respublikalıq ilimiy-teoriyalıq konferenciya bolıp ótti.

Ilajǵa Respublikalıq Ruwxıylıq hám aǵartıwshılıq orayı Qaraqalpaqstan Respublikalıq bólimi baslıǵı T.Atamuratov, «Nuranıy» qorı Nókis qalalıq keńesiniń baslıǵı K.Qalandarov, Qaraqalpaqstan xalıq jazıwshısı, filologiya ilimleriniń doktorı, professor K.Allambergenov, filologiya ilimleriniń doktorı, professor Q.Járimbetov, Ózbekstan hám Qaraqalpaqstan Jazıwshılar awqamlarınıń aǵzası, shayır R.Otarbaev, sonday-aq, instituttıń professor-oqıtıwshıları, tyutorlar, studentler hám ǵalaba xabar quralları wákilleri qatnastı.

 

Konferenciyanı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ilajda Sh.Usnatdinovtıń ómiri hám dóretiwshiligine arnalǵan bayanatlar jasaldı.

Sharap Usnatdinov 1942-jılı Kegeyli rayonında tuwılǵan. 1958-jılı Shomanay rayonında orta mektepti pitkergennen keyin Taqıyatas qalasındaǵı eki jıllıq qurılıs uchilichesin, soń Ózbekstan Milliy universitetiniń jurnalistika fakultetin pitkergen. Dáslepki miynet jolın házirgi «Qaraqalpaqstan jasları» gazetasında ádebiy xatkerlikten baslap, 30 jıl dawamında baspasóz hám ǵalaba xabar qurallarında túrli lawazımlarda isledi.

Sh.Usnatdinov 1974-1976-jılları «Qaraqalpaqstan jasları» gazetasınıń bas redaktorı, 1978-1983-jıllarda Qaraqalpaqstan mámleketlik teleradio komiteti baslıǵınıń televidenie boyınsha orınbasarı, 1985-1988-jılları «Qaraqalpaqstan» baspasınıń direktorı, 1988-1990-jılları Oblastlıq partiya komitetiniń xatkeri, 1976-1978, 1983-1985-jılları «Erkin Qaraqalpaqstan» gazetasınıń bas redaktorınıń orınbasarı, 1988-1992-jılları usı gazetanıń bas redaktorı bolıp isledi.

Ol 1992-jılı paytaxtımız Nókis qalasınıń hákimi bolıp saylandı.

1994-1995-jılları Ózbekstan Respublikası Mádeniyat isleri ministriniń orınbasarı, 1995-2002-jıllarda Qaraqalpaqstan Respublikası Kommunallıq xızmet kórsetiw ministri, 2002-2007-jılları «Kommunallıq ıssılıq orayı» AAJ baslıǵı, 2007-2009-jılları Qaraqalpaqstan Respublikası Ministrler Keńesi baslıǵınıń baspasóz xatkeri, 2009-2011-jılları Qaraqalpaqstan Respublikası ruwxıy úgit-násiyat orayınıń baslıǵı, 2011-jıldan «Nuranıy» qorı baslıǵı bolıp isledi.

Bir neshe mártebe Qaraqalpaqstan Respublikası Joqarǵı Keńesi deputatı, 2009-jılda Ózbekstan Respublikası Oliy Majlis Senatı aǵzası bolıp saylandı.

Sharap Usnatdinovtıń sońǵı jıllar ishinde «Kimge kesh, kimge tań sáhár», «Kórgenlerim, kewildegilerim», «Isbilermenlikke miratnama», «Jurnalistikaǵa kirisiw» sıyaqlı onlaǵan kitapları baspadan shıqtı.

Ol 45 jıllıq dóretiwshilik miyneti dáwirinde birneshe júzlegen maqala, ocherk hám publicistikalar jazıp, jurtshılıqqa keńnen tanıldı. Jazıwshı, jurnalisttiń sońǵı dáwirlerde qaharman shayır I.Yusupovtıń ómir jolına baǵıshlanǵan «Ibrayım Yusupov», «Shayırdıń jaslıǵı» atlı romanları, «Debdiwli tolǵanıslar» atlı kitabı baspadan shıqtı.

Sh.Usnatdinov kóp jıllıq xızmetleri ushın «El-yurt hurmati», «Fidokorona xizmatlari uchun» ordenleri menen sıylıqlanǵan. Ol jazıwshılar hám jurnalistler awqamlarınıń aǵzası, «Qaraqalpaqstanǵa miyneti sińgen jurnalist», «Qaraqalpaqstan xalıq jazıwshısı» boldı.

Ilajda sózge shıqqanlar Sh.Usnatdinovtıń ómiri, miynet jolı, úlgili isleri, dóretken shıǵarmaları xalqımızdıń yadında máńgige qalatuǵını, keleshek áwladlar ushın biybaha miyras ekenligin atap ótti.

NMPI baspasóz xızmeti.