ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Abiturientlerdi onlayn dizimge alıw baslandı

Búgin, 20-iyun kúninen baslap 2022-2023-oqıw jılı ushın joqarı oqıw orınlarınıń bakalavriat bilimlendiriw baǵdarlarına abiturientlerdi onlayn dizimge alıw baslandı.

Mámleketlik test orayınıń málim etiwinshe, bul processte abiturientler telefon nomerin avtorizaciyadan ótkerip, pasport maǵlıwmatları, turaqlı jasaw mánzili hám pitkergen bilimlendiriw mákemesi boyınsha maǵlıwmatlardı kirgiziwi, sonday-aq, jeńillikleri bolǵan jaǵdayda, olardı tekseriwi hám shet tilinen milliy yamasa xalıqaralıq sertifikatqa iye bolsa, sertifikat maǵlıwmatların kirgiziwi múmkin.

Bilimlendiriw baǵdarların bolsa 2022-2023-oqıw jılı ushın qabıllaw parametrleriniń bilimlendiriw tilleri boyınsha bólistiriliwi tastıyıqlanǵannan soń saylawı múmkin boladı.

Abiturientlerdi dizimge alıw:

— Mámleketlik test orayınıń my.dtm.uz saytı;
— Birden-bir interaktiv mámleketlik xızmetler portalı – my.gov.uz arqalı onlayn tárizde ámelge asırıladı.

Dizimge alıw 20-iyulǵa shekem (sol kúni de) dawam etedi hám abiturientler 20-iyulǵa shekem óz maǵlıwmatların ózgertiwi jáne shet tilinen milliy yamasa xalıqaralıq sertifikatqa iye bolatuǵın bolsa, sertifikat maǵlıwmatların kirgiziwi múmkin boladı.

Shet tilinen kásiplik (dóretiwshilik) imtixan ótkeriletuǵın bakalavriat bilimlendiriw baǵdarlarına onlayn dizimge alıw bolsa 10-iyulǵa shekem (sol kúni de) ámelge asırıladı.

NMPI baspasóz xızmeti.