Búgin, 25-iyun kúni paytaxtımızdıń payızlı orınlarınıń biri bolǵan Qaraqalpaqstan kórkem óner sarayında 30-iyun – Jaslar kúni múnásibeti menen ótkerilip atırǵan «Jaslar aylıǵı» sheńberinde Joqarǵı Keńes Baslıǵı hám jaslar ushırasıwı bolıp ótti.

Ilaj sheńberinde hár bir joqarı oqıw ornınıń student-jasları tárepinen qolǵa kirgizilgen tabısları sáwlelengen kórgizbe jıynalǵanlar názerine usınıldı.

Ilajda Qaraqalpaqstan Respublikası Joqarǵı Keńesiniń Baslıǵı Murat Kamalov sózge shıǵıp, ilaj qatnasıwshıların hám elimizdiń barlıq jasların 30-iyun – Jaslar kúni bayramı menen qutlıqladı.

Ushırasıw sheńberinde ilim, bilimlendiriw, kórkem óner, mádeniyat, sport hám basqa da tarawlarda ayrıqsha jetiskenliklerge erisip kiyatırǵan 24 jasqa «Úmit ushqını» kókirek nıshanı saltanatlı túrde tapsırıldı.

Quwanıshlısı, olar arasında Ájiniyaz atındaǵı Nókis mámleketlik pedagogikalıq institutınıń bir topar student-jasları da bar.

Atap aytqanda, institut magistrantı Allayar Dármenov, studentler Dilbar Jumaniyazova, Periyzat Ayapbergenova, Gúlayım Erjanbaeva, Yusup Qurbaniyazov, Bahadır Quwatbaev Joqarǵı Keńes Baslıǵınan kókirek nıshanların qabıllap aldı.

Sonıń menen birge, elimizde alıp barılıp atırǵan reformalarda belsendilik kórsetip, qatarlaslarına ayrıqsha úlgi bolıp kiyatırǵan 15 jasqa Joqarǵı Keńestiń minnetdarshılıq xatları tapsırılǵan bolsa, olar arasında NMPI doktorantı Qonısbay Sársenbaev, studentler Nursultan Nurniyazov, Islam Dilmanov, Erkinay Orınbaeva, Dáwranbek Endirbaev hám Aysulıw Ótepbergenovalardıń bolıwı institutımız ushın úlken quwanısh hám bayramǵa múnásip sawǵa boldı.

NMPI baspasóz xızmeti.