Búgin, 25-iyun kúni Ájiniyaz atındaǵı Nókis mámleketlik pedagogikalıq institutı akademiyalıq liceyinde 2021-2022-oqıw jılında liceydi pitkerip atırǵan oqıwshılarǵa diplom tapsırıw saltanatı bolıp ótti.

Ilajǵa instituttıń oqıw isleri boyınsha prorektorı M.Jumamuratov, birqatar professor-oqıtıwshılar, licey jámááti, pitkeriwshi oqıwshılardıń ata-anaları hám keń jámiyetshilik wákilleri qatnastı.

Saltanatlı ilajda licey direktorı Q.Kalxorazov sózge shıǵıp, licey oqıwshıları, sonıń ishinde, bıyılǵı jılı pitkerip atırǵan okıwshılar tárepinen qolǵa kirgizilgen nátiyjeler haqqında aytıp ótti.

Juwmaqlanıp atırǵan bıyılǵı oqıw jılında akademiyalıq liceydi 275 oqıwshı tabıslı pitkerip shıqpaqta. Olar arasında respublikalıq, xalıqaralıq kólemde ótkerilgen tańlawlar, pán olimpiadaları, sport jarıslarında úlken tabıslarǵa erisken jaslar kópshilik.

Atap aytqanda, 13 oqıwshı shet tillerin biliw dárejesi boyınsha milliy sertifikatqa (B2), al 8 oqıwshı bolsa xalıqaralıq sertifikatqa (IELTS) iye boldı.

Sonday-aq, Qaraqalpaqstan Respublikası kóleminde ótkerilgen III basqısh pánler olimpiadasında fizika páninen G.Aytjanova 1-orın, A.Qayratdinov 5-orındı iyeledi.

Licey pitkeriwshisi G.Perdebaeva sporttıń qılıshpazlıq túri boyınsha Aziya chempionı, sonıń menen birge, jáhán kubogı jarıslarında komandalıq esapta 1-orındı iyelegen bolsa, F.Salieva sporttıń shotokan-karate túrinen jáhán chempionatında 3-orındı iyeledi.

Bıyılǵı pitkeriwshi oqıwshılar arasında 5 oqıwshı múddetinen aldın student bolıw baxtına eristi.

Ilajda usınday nátiyjelerdi qolǵa kirgizip kiyatırǵan oqıwshılarǵa diplomlar saltanatlı túrde tapsırıldı.

Ilaj liceydiń talantlı oqıwshıları hám kórkem óner sheberleriniń atqarıwındaǵı koncert baǵdarlaması menen dawam etti.

NMPI baspasóz xızmeti.