ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Magistratura qánigeliklerine qabıllaw baslandı

2022-jıl 1-iyuldan baslap respublikalıq joqarı oqıw orınlarınıń magistratura qánigeliklerine qabıllaw ushın hújjetlerdi onlayn dizimge alıw procesi baslandı. Bul haqqında Joqarı hám orta arnawlı bilimlendiriw ministrligi xabar berdi.

2022-2023-oqıw jılı ushın mámleketlik joqarı oqıw orınlarınıń magistratura qánigeliklerine oqıwǵa kiriw ushın hújjetlerdi tapsırıw procesi ministrliktiń rásmiy http://magistr.edu.uz veb-saytı arqalı usı jıldıń 30-iyul kúnine shekem (sol kúni de) dawam etedi.

Ministrliktiń esletip ótiwinshe, 2022-2023-oqıw jılınan baslap magistraturaǵa qabıllaw abiturienttiń bakalavriat diplom balınıń ortasha kórsetkishi hám shet tilin biliw dárejesi boyınsha tiyisli milliy yamasa xalıqaralıq sertifikat balı tiykarında, ballar izbe-izligine qatań ámel etken halda ámelge asırıladı. Qosımsha imtixan ótkerilmeydi.

Maǵlıwmat ornında atap ótiw kerek, magistratura qánigelikleri hám joqarı bilimlendiriwden keyingi bilimlendiriw qánigeliklerine tańlawlarda milliy yamasa oǵan sáykes dárejedegi xalıqaralıq sertifikatqa iye adamlar qatnasıwı múmkin boladı.

Ministrlik magistratura hám doktoranturaǵa hújjet tapsırıwda talap etiletuǵın shet tillerin biliw dárejesin bahalaytuǵın milliy hám xalıqaralıq tán alınǵan sertifikatlar dizimin járiyaladı.

NMPI baspasóz xızmeti.