Búgin, 31-iyul kúni Ózbekstan Respublikası Joqarı hám orta arnawlı bilimlendiriw ministrliginen kelgen wákiller tárepinen Ájiniyaz atındaǵı Nókis mámleketlik pedagogikalıq institutında 2022-2023-oqıw jılı ushın bakalavriattıń ayrıqsha qábilet talap etiletuǵın tálim baǵdarlarına ótkeriliwi jobalastırılǵan kásiplik (dóretiwshilik) imtixanlarǵa tayarlıq processleri kózden ótkerildi.

Ministrlik janındaǵı Ruwxıylıq hám aǵartıwshılıq orayı direktorı F.Farhodov basshılıǵındaǵı wákillerge institut rektorı B.Otemuratov hám qabıllaw komissiyasınıń juwaplı xatkeri P.Kalxanov bakalavriattıń dene mádeniyatı, muzıkalıq tálim, súwretlew óneri hám injenerlik grafikası tálim baǵdarlarına ótkeriletuǵın kásiplik (dóretiwshilik) imtixanlar ótkeriletuǵın orınlardı kórsetip, bul jerde imtixanlardıń ádil hám ashıq-aydın ótiwi ushın jaratılǵan sharayatlar, atap aytqanda, imtixan procesin onlayn rejimde baqlap barıw, kútiw orınları kózden ótkerildi.

Esletip ótemiz, bakalavriattıń muzıkalıq tálim baǵdarına imtixanlar 1-avgusttan, dene mádeniyatı tálim baǵdarına 2-avgusttan, al súwretlew óneri hám injenerlik grafikası tálim baǵdarına kásiplik (dóretiwshilik) imtixanlar 3-avgusttan baslanıwı belgilengen.

Imtixanlar 9-avgustqa shekem bir kúnde eki mezgilde dawam etedi.

NMPI baspasóz xızmeti.