ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde kásiplik (dóretiwshilik) imtixanlar baslandı

Búgin, 1-avgust kúninen baslap Ájiniyaz atındaǵı Nókis mámleketlik pedagogikalıq institutında 2022-2023-oqıw jılına bakalavriattıń ayrıqsha qábilet talap etiletuǵın tálim baǵdarlarına qabıllaw ushın ótkeriletuǵın kásiplik (dóretiwshilik) imtixanlar baslandı.

Muzıkalıq tálim baǵdarı boyınsha ótkerilip atırǵan imtixanlardıń belgilengen talaplar tiykarında ádil hám ashıq-aydın ótiwi jámiyetlik shólkemler, siyasiy partiyalar, ǵalaba xabar quralları, sonıń menen birge, Joqarı hám orta arnawlı bilimlendiriw ministrliginen biriktirilgen wákiller tárepinen qadaǵalanbaqta.

Imtixanlar Internet tarmaǵı arqalı ata-analar hám keń jámiyetshilik wákillerine tikkeley alıp kórsetilmekte.

Abiturientlerdiń bilim hám kónlikpelerin bahalaw ushın Ózbekstannıń túrli jerlerinen tájiriybeli professorlar hám qánigeler biriktirilgen bolıp, olar tárepinen hár bir abiturienttiń tayarlıǵı ádil túrde bahalanıp, toplaǵan balları sol waqıttıń ózinde málim etilmekte.

— Búgin aqlıq qızım instituttıń muzıkalıq tálim baǵdarına dóretiwshilik imtixan tapsırıp atır. Onıń kishkeneliginen usı tarawǵa bolǵan qızıǵıwshılıǵın kórip, qollap-quwatlawǵa háreket ettik. Qızım muzıka sırların úyrenip, joqarı maǵlıwmatlı bolıp, maman kadr bolıwdı óz aldına maqset etken. Mine, búgin institutqa kelip, bul jerdegi jaratılǵan sharayatlardan kewlim toldı. Imtixan processleri qalay ótip atırǵanın ashıq-aydın tikkeley baqlap otırmız, — deydi Qońırat rayonınan kelgen nuranıy Seytnazar Qudaynazarov.

Biz imtixanǵa qatnasqan abiturientlerdiń pikirleri menen de qızıqsındıq.

— Imtixanǵa jaqsı tayarlıqlar kórip keldim. Saz atqarıwshılıǵı, muzıka teoriyası hám qosıq atqarıw sheberligi boyınsha ustazlarımnan úyrengen bilim hám kónlikpelerimdi kórsetiwge háreket ettim. Imtixan ádil ótip atır dep esaplayman. Óytkeni, óz taryalıǵıma say jaqsı baha aldım, — deydi qanlıkólli abiturient Tazabay Ájibaev.

Esletip ótemiz, institutta bakalavriattıń muzıkalıq tálim baǵdarına imtixanlar 1-avgusttan, dene mádeniyatı tálim baǵdarına 2-avgusttan, al súwretlew óneri hám injenerlik grafikası tálim baǵdarına kásiplik (dóretiwshilik) imtixanlar 3-avgusttan baslanıwı belgilengen.

Imtixanlar 9-avgustqa shekem bir kúnde eki mezgilde dawam etedi.

NMPI baspasóz xızmeti.