ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Dene mádeniyatı tálim baǵdarına kásiplik (dóretiwshilik) imtixanlar baslandı

Búgin, 2-avgust kúninen baslap Ájiniyaz atındaǵı Nókis mámleketlik mámleketlik pedagogikalıq institutında 2022-2023-oqıw jılı ushın bakalavriattıń dene mádeniyatı tálim baǵdarına kásiplik (dóretiwshilik) imtixanlar baslandı.

Erte tańnan baslanǵan imtixanlarda dene mádeniyatı tálim baǵdarınıń kúndizgi ózbek toparına hújjet tapsırǵan 131 abiturient toparlarǵa bólingen halda 100 metrge hám 1000 metr aralıqqa juwırıw boyınsha óz tayarlıqların jáne imkaniyatların sınap kórmekte.

— Usı tálim baǵdarına birneshe jıllardan berli hújjet tapsırıp, oqıwǵa kiriwdi niyet etip júrgen edim. Kásiplik (dóretiwshilik) imtixanlarǵa hám májbúriy pánlerden ótkeriletuǵın test sınaqlarına puqta tayarlıq kóriwge háreket ettim. Imtixanlardı tájiriybeli trener-oqıtıwshılar bahalap barmaqta hám hár bir abiturienttiń nátiyjesi normativler juwmaqlanǵan waqıttıń ózinde abiturientlerge málim etilip atırǵanı hár bir qatnasıwshınıń háreketleri ádil túrde bahalanıp atırǵanınan dárek beredi. Nesip etse, student bolıw baxtına erisip, usı tarawdıń maman qánigesi bolıwdı maqset etkenmen. Barlıq abiturientlerge áwmet tileymen! – deydi qońıratlı abiturient Salamat Dúzelov.

Ótkerilip atırǵan imtixanlarǵa aqlıǵınıń qatnasıp atırǵanın kóriwge kelgen xojelishi Sapura apa Írzamuratova, sonday-aq, imtixan tapsırıp atırǵan óz perzentin qollap-quwatlawǵa kelgen ámiwdáryalı Sayyora Xojaniyazovalar menen imtixan barısı haqqında sáwbetlestik.

Olar óz perzentleriniń imtixanlarǵa jaqsı tayarlıqlar menen kelgenligin, sonday-aq, imtixanlardıń ashıq-aydın, ádil túrde ótkerilip atırǵanın ayrıqsha atap ótip, barlıq shólkemlestiriwshiler, imtixan alıwshı qánigelerge minnetdarshılıqların bildirdi.

Esletip ótemiz, institutta bakalavriattıń muzıkalıq tálim baǵdarına imtixanlar 1-avgusttan, dene mádeniyatı tálim baǵdarına 2-avgusttan, al súwretlew óneri hám injenerlik grafikası tálim baǵdarına kásiplik (dóretiwshilik) imtixanlar 3-avgusttan baslanıwı belgilengen.

Imtixanlar 9-avgustqa shekem dawam etedi.

NMPI baspasóz xızmeti.