Búgin, 4-avgust kúni Ájiniyaz atındaǵı Nókis mámleketlik pedagogikalıq institutında bakalavriattıń súwretlew óneri hám injenerlik grafikası tálim baǵdarı kúndizgi qaraqalpaq hám ózbek toparlarına qabıllaw ushın kásiplik (dóretiwshilik) imtixanlar ótkerilmekte.

Imtixanlar Internet tarmaǵı arqalı ata-analar hám keń jámiyetshilik wákillerine tikkeley alıp kórsetilmekte.

Biz perzentleriniń imtixan tapsırıp atırǵanın onlayn rejimde tikkeley baqlap otırǵan ata-analardı sáwbetke tarttıq.

— Men, Kárima Saparova Xojeli rayonında jasayman. Búgin qızım imtixanǵa qatnasıp atır. Bul jerde tek ǵana abiturientler ushın emes, sonıń menen birge, baqlap otırıwǵa kelgen ata-analar ushın da sharayatlar jaratılǵan. Hesh qanday tanıs-bilisshilik bolıp atırǵanı joq. Barlıǵı ádil hám ashıq-aydın ótkerilip atırǵanınıń gúwası bolıp otırmız. Barlıq shólkemlestiriwshilerge minnetdarshılıq bildiremen, — deydi abiturienttiń anası.

Jáne bir abiturienttiń anası Gúlzar Fazılova biz benen sáwbetlesiw barısında bılay dedi:

— Imtixanlar Ózbekstannıń basqa aymaqlarınan kelgen tájiriybeli qánigeler tárepinen alınıp atır eken. Imtixan procesi ádil ótip atır dep esaplayman. Barlıq abiturientlerge áwmet tilep qalaman.

Biz imtixan procesin baqlap barıwdı dawam etemiz. Saytımızdı oqıp barıń.

Imtixanlar 9-avgustqa shekem dawam etedi.

NMPI baspasóz xızmeti.