ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Dene mádeniyatı hayal-qızlar sportı tálim baǵdarına qabıllaw ushın kásiplik (dóretiwshilik) imtixanlar ótkerilmekte

Búgin, 5-avgust kúni Ájiniyaz atındaǵı Nókis mámleketlik pedagogikalıq institutında 2022-2023-oqıw jılında bakalavriattıń dene mádeniyatı hayal-qızlar sportı tálim baǵdarına qabıllaw ushın kásiplik (dóretiwshilik) imtixanlar ótkerilmekte.

Erte tańnan baslanǵan imtixanlarǵa usı tálim baǵdarınıń kúndizgi qaraqalpaq hám ózbek toparlarına hújjet tapsırǵan abiturientler qatnastı.

100 metr hám 1000 metr aralıqqa juwırıw boyınsha ótkerilgen imtixanlarda abiturientler ózleriniń fizikalıq tayarlıqları hám sport sheberliklerin kórsetiwshge háreket etti.

— Men Ellikqala rayonınan birneshe shákirtlerimdi búgingi imtixanlarǵa alıp keldim. Olar jaqsı nátiyjelerdi kórsetip atır. Imtixan barısın tikkeley baqlap otırman. Barlıǵı ádil túrde ótkerilip, bahalanıp atır, — deydi ellikqalalı trener Biyimbet Biykeshov.

Biz imtixanlarǵa qatnasıp, óz imkaniyatların sınap kórgen abiturientlerdi sáwbetke tarttıq.

— Men sporttıń sambo túri boyınsha birneshe jıllardan berli shuǵıllanıp kiyatırman. Bıyıl mektepti tabıslı pitkerip, institutqa hújjet tapsırdım. Búgingi ótkerilgen imtixanlarda joqarı nátiyjelerge eristim. Keleshekte elimiz bayraǵın kóklerge kóteretuǵın sportshılardı tayarlap shıǵarıw niyetindemen, — deydi Nókis rayonınan kelgen abiturient Janar Orınbaeva.

Abiturientlerdiń kópshiligi sport penen turaqlı shuǵıllanıp, joqarı nátiyjelerdi qolǵa kirgizip kiyatırǵan jaslar bolıp esaplanadı. Biz olar menen de sáwbetlestik.

— Men sporttıń erkin gúres túri menen 7-klass waqtımnan baslap shuǵıllanaman. Birneshe márte Qaraqalpaqstan hám Ózbekstan birinshiliklerinde jeńimpaz boldım. Mektepti usı jılı pitkerdim hám óz qızıǵıwshılıǵım menen instituttıń dene mádeniyatı hayal-qızlar sportı tálim baǵdarına hújjet tapsırdım. Búgingi imtixanda 100 metr hám 1000 metrge juwırıwda jaqsı nátiyjelerge eristim. Barlıq abiturientlerge áwmet tileymen! – deydi nókisli abiturient Sárbinaz Qıdırbaeva.

NMPI baspasóz xızmeti.