Búgin, 6-avgust kúni Ájiniyaz atındaǵı Nókis mámleketlik pedagogikalıq institutında 2022-2023-oqıw jılı ushın bakalavriattıń muzıkalıq tálim baǵdarı sırtqı qaraqalpaq toparına qabıllaw ushın kásiplik (dóretiwshilik) imtixanı bolıp ótti.

Abiturientler arasında aymaqlardaǵı balalar muzıka hám kórkem óner mekteplerine muǵallim bolıp islep atırǵan, joqarı maǵlıwmatlı qánige bolıwdı maqset etkenler kópshilikti quraydı. Biz olardıń birin sáwbetke tarttıq.

– 2005-jılı Nókis qalasındaǵı qánigelestirilgen kórkem óner mektebin pitkerip, sonnan berli Qanlıkól rayonındaǵı balalar muzıka hám kórkem óner mektebinde baqsıshılıq hám duwtar shertiw boyınsha keleshek áwladlarǵa bilim berip kelmektemen. Ózim ustalar áwladınanman. Atamız aǵash ustası sıpatında belgili bolǵan. Men de atamnıń kásibin dawam ettirgen halda búgingi kúnde milliy saz ásbabımız bolǵan alamoynaq duwtarın ózim isleymen. Sonıń menen birge, balalarǵa ustazlıq etip, shákirtler tayarlap atırman, – deydi qanlıkólli abiturient Qádirbergen Saparniyazov.

Esletip ótemiz, usı tálim baǵdarına qabıllaw ushın dóretiwshilik imtixanlar usı jıldıń 9-avgust kúnine shekem dawam etedi.

NMPI baspasóz xızmeti.