Ájiniyaz atındaǵı Nókis mámleketlik pedagogikalıq institutınıń studenti Dilfuza Ayımbetova Túrkiya Respublikasınıń Konya qalasında ótkerilip atırǵan Islam tileklesligi oyınlarında sporttıń erkin gúres túri boyınsha jarıslarda qatnasıp, qola medalın jeńip aldı. Bul haqqında Qaraqalpaqstan xabar agentligi málim etti.

Kishkene waqıtlarınan baslap-aq sporttıń erkin gúrestúrine qızıqqan Dilfuza Nókis qalasındaǵı Respublikalıq jeke gúres túrleri boyınsha balalar hám jas óspirimler sport mektebinde Aynura Japaqova hám Zayır Otarbaevlardıń qol astında shuǵıllana basladı. Óziniń uqıplılıǵı hám jigerliligi menen basqalardan ayrıqshalanıp turatuǵın bul sportshı oqıwshılıq dáwirinde-aq Qaraqalpaqstan hám Ózbekstan chempionatlarında jeńiske erisip, xalıqaralıq jarıslarǵa da qatnasa basladı.

– Usı jıldıń fevral ayında Qazaqstan Respublikası paytaxtı Nur-Sultan qalasında eresekler arasında ótkerilgen Aziya chempionatında sherek finalǵa shekem jetip barǵan edi,-deydi bizge sportshınıń treneri Aynura Japaqova. – Al, Túrkiyanıń Konya qalasında ótkerilip atırǵan Islam tileklesligi oyınları jarısında bolsa 59 kg salmaqta qatnasıp, qola medalın qolǵa kirgiziwge eristi. Bizler bunnan oǵada quwanıshlımız.

Maǵlıwmat ornında atap ótiw kerek, instituttıń dene tárbiyası kafedrasınıń aǵa oqıtıwshısı, sport veteranı Azat Kazakov Islam tileklesligi oyınlarında sporttıń voleybol túri boyınsha Ózbekstan saylandı komandasınıń treneri sıpatında qatnasıp atırǵan bolsa, institut student hám magistrantları bolǵan U.Turǵanbaeva, A.Joldasbaeva, N.Reyimbaevalar usı saylandı komanda quramında jarıslarda qatnaspaqta.

NMPI baspasóz xızmeti.