ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde Ózbekstan Respublikası Ǵárezsizliginiń 31 jıllıǵına arnalǵan mánawiyat festivalı bolıp ótti

Ájiniyaz atındaǵı Nókis mámleketlik pedagogikalıq institutında Ózbekstan Respublikası Ǵárezsizliginiń 31 jıllıǵı múnásibeti menen «Jańa Ózbekstanda el áziz, insan áziz!» súreni tiykarında mánawiyat festivalı bolıp ótti.

Festivalǵa Respublikalıq Ruwxıylıq hám aǵartıwshılıq orayı wákilleri, milliy-mádeniy oray basshıları, institut professor-oqıtıwshıları, student-jaslar, sonday-aq, institut átirapındaǵı «Qumbız awıl» hám «Kók ózek» mákan puqaralar jıyınlarınıń turǵınları, nuranıylar, sonday-aq, Ózbekstan hám Qaraqalpaqstan Respublikalarınıń mádeniyat hám kórkem óner sheberleri, ádebiyat wákilleri qatnastı.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov sózge shıǵıp, elimizde jámiyetlik-siyasiy, sociallıq-ekonomikalıq, mádeniy hám ruwxıy tarawlarda alıp barılıp atırǵan reformalar, jaslar siyasatına qaratılıp atırǵan itibar, olardıń bilim alıwı, kásip-óner úyreniwi ushın jaratılıp atırǵan imkaniyatlar haqqında atap ótip, usınday iygilikli baslamalarǵa juwap retinde institut jaslarınıń qolǵa kirgizip atırǵan tabısları haqqında keń túrde toqtalıp ótti.

Festivalda instituttıń «Tumaris» xalıq ansambli hám talantlı student-jaslarınıń atqarıwındaǵı milletler aralıq tatıwlıq, keńpeyillik, Watanǵa bolǵan muhabbat sıyaqlı sezimlerdi jırlaytuǵın qosıqlar, milliy ayaq-oyınlar atqarılıp, jıynalǵanlarǵa kóterińki keypiyat baǵıshladı.

Ilajǵa Qaraqalpaqstan Respublikası Ministrler Keńesi Baslıǵınıń orınbasarı R.Saparbaev qatnastı.

Institutta festival sheńberinde bir qatar ilajlar dawam etpekte.

NMPI baspasóz xızmeti.