ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Magistraturada oqıp atırǵan hayal-qızlardıń kontrakt tólemlerin mámleket tárepinen tólep beriw tártibi málim etildi

Ózbekstan Respublikası Ministrler Kabinetiniń 2022-jıl 15-avgusttaǵı 447-sanlı qararına muwapıq, mámleketlik joqarı oqıw orınlarınıń magistratura basqıshına tólemli kontrakt tiykarında oqıwǵa qabıllanǵan hám oqıp atırǵan hayal-qızlardıń tólemli kontrakt summasın mámleketlik byudjet qarjıları esabınan tólep beriw tártibi haqqındaǵı reje tastıyıqlandı.

Rejege muwapıq, mámleketlik joqarı oqıw orınları, sonıń ishinde, Prezident janındaǵı Mámleketlik basqarıw akademiyası, Bas prokuratura akademiyası, Ekonomikalıq rawajlanıw hám kámbaǵallıqtı qısqartıw ministrligi janındaǵı Biznes hám isbilermenlik joqarı mektebi jáne Bank-qarjı akademiyasınıń magistratura basqıshında oqıp atırǵan barlıq hayal-qızlardıń kontrakt tólemleri qaytarıw shártisiz tólep beriledi.

Bunda talaban 2022-2023-oqıw jılınan baslap oqıw jılı ushın tólemli kontrakttıń tolıq summasın tólep beriw boyınsha (eselengen tólemli kontrakt buǵan kirmeydi) ózleri oqıp atırǵan joqarı oqıw ornı rektorı (filial direktorı)nıń atına 15-sentyabrge shekem arza menen múrájat etedi.

Kórsetilgen múddetten keyin usınılǵan arzalar kórip shıǵılmaydı. Arzalar 3 jumıs kúninde kórip shıǵılıp, dizim qáliplestiriledi. Ulıwmalastırılǵan talabanlardıń dizimi 5 jumıs kúninde tólemli kontraktlardı tólep beriw ushın Joqarı hám orta arnawlı bilimlendiriw ministrligine (2023-jıldan joqarı oqıw orınlarınıń mákemelik tiyisliligi boyınsha ministrlik hám mákemelerine) jiberiledi.

Talabanlarǵa tólemli kontrakt summasın tólep beriw haqqında usı oqıw jılınıń 15-oktyabr kúnine shekem tiyisli joqarı oqıw ornı rektorı (filial direktorı)nıń buyrıǵı shıǵarıladı.

«Kun.uz» basılımı házirgi waqıtta magistratura basqıshında oqıp atırǵan, eselengen kontrakt tiykarında oqıwǵa qabıl etilgen hayal-qızlarǵa da kontrakt tólemleri tólep beriledi me? degen mazmundaǵı soraw menen Joqarı hám orta arnawlı bilimlendiriw ministrliginiń málimleme xızmetine múrájat etken.

Ministrlik málimleme xızmetiniń qánigesi Zafar Ámirqulovtıń atap ótiwinshe, engizilip atırǵan bul jańa tártip tek ǵana bazalıq kontrakt boyınsha qabıl etilgenlerge ámel etedi.

«Máselen, kvotada jámi 10 orın, sonnan 2 grant hám 8 kontrakt ajıratılǵan bolsa, nátiyjesi boyınsha birinshi 8 likte studentlikke usınıs etilgen magistrlardıń bıyılǵı kontrakt summaları tólep beriledi. 8 den tısqarı qosımsha qabıl etilgenlerge qollanılmaydı. Bul tek ǵana birinshi kursqa qabıl etiletuǵın studentler ushın. Eger magistratura basqıshında oqıp atırǵan hayal-qızlar birinshi kursqa kvotadan tıs, eselengen kontrakt tiykarında qabıl etilgen bolsa, olarǵa da ekinshi kurstan kontrakt summası tólep beriledi», — dep aytıp ótken ministrlik qánigesi.

Esletip ótemiz, 2022-jıl 7-marttaǵı «Shańaraq hám hayal-qızlardı sistemalı qollap-quwatlawǵa baylanıslı jumıslardı bunnan bılay da jedellestiriw ilajları haqqında»ǵı prezident pármanında mámleketlik joqarı oqıw orınlarınıń magistratura basqıshında oqıp atırǵan barlıq hayal-qızlardıń kontrakt tólemleri qaytarıw shártisiz tólep beriliwi belgilengen edi. Bunıń ushın mámleket tárepinen 23 mıń hayal-qızǵa 200 milliard sum ajıratılıwı atap ótilgen edi.

NMPI baspasóz xızmeti.