Búgin, 22-avgusttan baslap Ájiniyaz atındaǵı Nókis mámleketlik pedagogikalıq institutı kafedralarına assistent-oqıtıwshı hám stajyor-oqıtıwshılıqqa talabanlardı jumısqa qabıllaw ushın sáwbetlesiwler baslandı.

Sáwbetlesiwlerge hújjetler instituttıń vakanciyalar platforması arqalı usı jıldıń 15-avgust sánesine shekem onlayn tárizde qabıl etilgen edi.

Sáwbetlesiwlerde institut rektorı Bayrambay Otemuratov, prorektorlar, kafedra baslıqları hám tiyisli juwapkerler qatnasıp, talabanlardıń bilimi, kónlikpeleri, tájiriybesi, sonday-aq, aldaǵı jobaları boyınsha pikir almasıp, olardı belgilengen kriteriyalar tiykarında saylap almaqta.

– Men bıyıl usı instituttıń magistratura basqıshın tabıslı pitkerip shıqtım, – deydi belgili jas shayır, awdarmashı Allayar Dármenov. – Búgin filologiya baǵdarları boyınsha hújjet tapsırǵan talabanlar sáwbetlesiwge shaqırıldı. Tikkeley rektor hám kafedra baslıqları menen sáwbetlesip, qolǵa kirgizgen nátiyjelerim, aldaǵı maqsetlerim jóninde maǵlıwmatlar berdim. Keleshekte usı institutta islep, ilim jolında da, jaslardıń dóretiwshiligin qollap-quwatlaw baǵdarında da óz jobalarımdı ámelge asırıw niyetindemen.

Sáwbetlesiwler barısında talabanlardıń óz qánigelikleri boyınsha ámelge asırǵan jumısları, ilimiy izleniwleri menen shet tillerin biliw dárejesi, zamanagóy pikirlewi, aldaǵı belgilegen wazıypalardı ámelge asırıw mexanizmlerine de ayrıqsha dıqqat awdarılmaqta.

Jumısqa qabıllaw ushın talabanlar menen sáwbetlesiwler dawam etpekte.

NMPI baspasóz xızmeti.