2022-2023-oqıw jılı ushın mámleketlik joqarı oqıw orınlarınıń magistratura qánigeliklerine qabıllaw boyınsha magistr.edu.uz elektron sisteması arqalı onlayn dizimnen ótken 10 mıń 31 talabannıń arzaları tolıq kórip shıǵıldı.

Joqarı hám orta arnawlı bilimlendiriw ministrligi málimleme xızmetiniń xabar beriwinshe, jámi qabıl etilgen arzalar sanı 5 mıń 219 dı quraydı.

Sonnan shet tili boyınsha sertifikatqa iye talabanlar 4 mıń 582 bolsa, 637 talaban tańlawda qatnaspastan jeńillikke iye bolǵanlar bolıp esaplanadı. Bular:

— mámleketlik stipendiatlar – 296;
— ximiya, biologiya hám informatika baǵdarları boyınsha jeńillikli diplom iyeleri – 159;
— ximiya, biologiya, fizika hám informatika pán olimpiadalarınıń jeńimpazları – 12;
— kózzi ázziler kategoriyasına kiretuǵın ayrıqsha bahalarǵa oqıǵan pitkeriwshiler – 170.

Talabanlar magistraturaǵa qabıllaw nátiyjelerin magistr.edu.uz platformasındaǵı jeke kabineti arqalı bilip alıwı múmkin.

Maǵlıwmat ornında atap ótiw kerek, bıyıl magistratura qánigeliklerine qabıllaw jańa tártipte, yaǵnıy talabannıń shet tili boyınsha sertifikatı hám oqıwı dawamında toplaǵan ortasha balı kórsetkishleri tiykarında bolıp ótti.

Magistraturaǵa bıyılǵı qabıllaw kvotasında 16 mıń 933 orın ajıratılǵan bolıp, kórinip turǵanınday qabıllaw kvotası tolmadı. Bul hújjet tapsırǵan talabanlardıń shet tili boyınsha sertifikatları bolmawı menen baylanıslı jaǵday bolıp esaplanadı. Jańa tártip boyınsha bıyıldan baslap magistraturaǵa qabıllaw bir jılda 2 márte ámelge asırıladı, yaǵnıy yanvar ayında bos orınlarǵa jáne tańlaw bolıp ótedi.

Málim etiliwinshe, ótken jılı magistraturaǵa hújjet tapsırǵanlardıń 768 inde shet tili boyınsha sertifikat bolǵan bolsa, bıyıl olardıń sanı 4 mıń 582 ni quraǵan.

Qaraqalpaqstan xabar agentligi.