Xabarıńız bar, paytaxtımız Nókis qalasınıń «Jańabazar» mákan puqaralar jıyını aymaǵında dóretiwshilik hám abadanlastırıw jumısları qızǵın pátlerde alıp barılmaqta. Búgin aymaq óz atına say jańasha túske enip, xalqımız ushın múnásip turmıslıq sharayatlar jaratılmaqta.

Usınday iygilikli baslamaǵa múnásip úles qosıw, sonday-aq, aymaq xalqınıń, ásirese, ósip kiyatırǵan jas áwladlardıń bos waqıtların mazmunlı ótkeriw, olardıń kewil keypiyatların kóterip, járdemge mútáj shańaraqlardı qollap-quwatlaw maqsetinde Ájiniyaz atındaǵı Nókis mámleketlik pedagogikalıq institutı jámááti tárepinen itibarǵa ılayıqlı jumıslar ámelge asırılmaqta.

Búgin, 24-avgust kúni Joqarı hám orta arnawlı bilimlendiriw ministrligi jáne instituttıń Baslawısh tálim hám Mektepke shekemgi tálim fakultetleri baslaması menen aymaq turǵınları, balalar hám jas óspirimler qatnasıwında ruwxıy-aǵartıwshılıq ilajı shólkemlestirildi.

Ilajda institut wákilleri sózge shıǵıp, jıynalǵanlardı Ózbekstan Respublikası Ǵárezsizliginiń 31 jıllıǵı menen qutlıqlap, mámleketimiz tárepinen xalıqtıń abadan turmısı ushın islenip atırǵan búgingidey jumıslardıń áhmiyeti haqqında atap ótti.

Ilajda institut rektorı Bayrambay Otemuratov, Joqarı hám orta arnawlı bilimlendiriw ministrligi janındaǵı Ruwxıylıq hám aǵartıwshılıq orayı direktorı Fozilbek Farhodov, prorektorlar, fakultet dekanları tárepinen aymaq balaları hám jas óspirimlerine jaqınlasıp kiyatırǵan jańa oqıw jılında mektepte zárúr bolǵan oqıw quralları sawǵa etildi.

Óz gezeginde, ata-analar bunday itibar hám ǵamqorlıqlar ushın húkimetimiz basshılarına, institut jámáátine ayrıqsha minnetdarshılıǵın bildirdi.

Instituttıń qábiletli student-jasları hám aymaq balalarınıń atqarıwındaǵı koncert baǵdarlaması, naqıl-maqallar, qosıqlar aytısı, atqarılǵan hár qıylı ayaq-oyınlar keshe qatnasıwshılarına kóterińki keypiyat baǵıshladı.

NMPI baspasóz xızmeti.