Xabarıńız bar, mámleketimizdegi barlıq bilimlendiriw mákemelerinde jańa 2022-2023-oqıw jılı 5-sentyabrden baslanıwı belgilengen. Házirgi waqıtta barlıq bilimlendiriw orınları qatarında Ájiniyaz atındaǵı Nókis mámleketlik pedagogikalıq institutında da jańa oqıw jılında studentlerdi qabıllaw ushın qızǵın tayarlıqlar ámelge asırılmaqta.

Búgin, 4-sentyabr kúni institut rektorı Bayrambay Otemuratov basshılıǵında barlıq prorektorlar instituttıń barlıq fakultetlerinde auditoriyalar, laboratoriyalar, oqıw-óndirislik ustaxanalar, málimleme-resurs hám informaciyalıq texnologiyalar orayları, sport maydanshalarınıń jańa oqıw jılına tayarlıǵın kózden ótkerdi.

Fakultet dekanları hám kafedralardıń baslıqları menen ushırasıp, oqıw jobaları hám oqıw-metodikalıq komplekslerdiń jaǵdayı menen tanıstı. Olar menen birgelikte ámelge asırılatuǵın jumıslar belgilep alındı.

Sonıń menen birge, orın alıp atırǵan ayırım kemshilikler qatań sınǵa alınıp, tez pursatlarda olardı saplastırıw hám unamlı sheshiw boyınsha juwapkerlerge tiyisli tapsırmalar berildi.

Úyreniw jumısları instituttıń tórtinshi oqıw imaratında da alıp barıldı. Bul jerde qurılıs-rekonstrukciya jumısları juwmaqlanıw aldında turǵan bolıp, jańa oqıw jılınıń dáslepki kúnlerinde studentlerdi qabıllawǵa tayar halǵa keltirilmekte. Rektor qurılıs jumısların alıp barıp atırǵan kárxana basshısı menen sáwbetlesip, jumıslardı tez pursatlarda, sapalı etip juwmaqlaw boyınsha ámelge asırılatuǵın jumıslardı belgilep aldı.

NMPI baspasóz xızmeti.