Búgin, 5-sentyabr kúni mámleketimizdegi barlıq bilimlendiriw mákemelerinde bolǵanı sıyaqlı Ájiniyaz atındaǵı Nókis mámleketlik pedagogikalıq institutında jańa 2022-2023-oqıw jılı Ǵárezsizlik sabaqları menen baslandı.

Ǵárezsizlik sabaqları Ózbekstan hám Qaraqalpaqstan Respublikalarınıń mámleketlik gimnleri menen baslandı.

Ótkerilgen Ǵárezsizlik sabaqlarına Qaraqalpaqstan Respublikası Ishki isler ministri, polkovnik B.Tórebekov, institut rektorı B.Otemuratov hám prorektorlar qatnasıp, sońǵı jıllarda elimizde jaslar siyasatı, sonıń ishinde, joqarı bilimlendiriw sistemasın rawajlandırıw ushın ámelge asırılıp atırǵan reformalar hám olardıń áhmiyeti haqqında atap ótti.

Baslanıp atırǵan jańa oqıw jılında Nókis mámleketlik pedagogikalıq institutına birinshi joqarı oqıw ornı sıpatında 32 mıńnan aslam abiturient hújjet tapsırǵan bolsa, sonnan 3 mıńǵa shamalas abiturient student bolıw baxtına miyasar boldı.

Ǵárezsizlik sabaqlarında elimizde milletler aralıq doslıq, tatıwlıq, keńpeyillik sıyaqlı ulıwma insanıy qádiriyatlardıń turmısımızda qanshelli dárejede úlken áhmiyetke iye bolıp atırǵanı, mámleketimizdiń rawajlanıwı, xalqımızdıń abadan turmısta jasawı ushın ámelge asırılıp atırǵan jumıslar haqqında turmıslıq mısallar menen tolıq túsinikler berildi.

Sonıń menen birge, institut rektorı B.Otemuratov tárepinen bilimlendiriw tarawında derlik 90 jıllıq tariyxına hám qádiriyatlarına iye bolǵan pedagogikalıq institutta oqıw, ilimiy-izertlew jumısların alıp barıw ushın jaratılǵan sharayatlar, oqıw procesin shólkemlestiriw máseleleri haqqında studentlerge, sonday-aq, olardıń ata-analarına maǵlıwmatlar berildi.

Ǵárezsizlik sabaqları barlıq fakultetlerdegi akademiyalıq toparlarda dawam etpekte.

NMPI baspasóz xızmeti.