Ózbekstan Respublikası Prezidentiniń pedagog kadrlar tayarlaytuǵın joqarı bilimlendiriw mákemelerin sistemalı rawajlandırıw hám olarda basqarıw jumısların jetilistiriw, aldınǵı sırt el tájiriybesin engizgen halda zamanagóy bilimlendiriw baǵdarlamaların islep shıǵıw, joqarı tájiriybeli professional kadrlar tayarlawdı jańa basqıshqa kóteriw, sonday-aq, pedagogika tarawında bilimlendiriw, ilim hám ámeliyattıń baylanıslılıǵın támiyinlew maqsetinde «Pedagogikalıq bilimlendiriw sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları haqqında»ǵı qararı qabıl etilgen edi.

Qararǵa muwapıq, 2022-2023-oqıw jılınan baslap pedagog kadrlar tayarlaytuǵın joqarı oqıw orınlarınıń kúndizgi bilimlendiriw formasında oqıp atırǵan 2-4-kurs studentleri ushın háptelik oqıw shınıǵıwları «4+2» tártibinde, yaǵnıy, sabaqlardıń 4 kúni joqarı oqıw ornında, 2 kúni mektepke shekemgi hám ulıwma orta bilim beriw mákemelerinde ámeliyat ótew tártibinde alıp barılıwı belgilengen edi.

Usı wazıypalardan kelip shıǵıp, Ájiniyaz atındaǵı Nókis mámleketlik pedagogikalıq institutında ámeliy jumıslar baslanıp ketti.

Atap aytqanda, Súwretlew óneri hám texnologiyalıq tálim fakulteti 4-kurs studentleri qatnasıwında konferenciya shólkemlestirildi.

Mektepke shekemgi tálim fakulteti studentleri tiyisli balalar baqshalarında ámeliyat procesin basladı.

Tariyx fakulteti milliy ideya, ruwxıylıq tiykarları hám huqıq tálimi kafedrasınıń baslıǵı E.Tilewov hám fakultet dekanınıń oqıw isleri boyınsha orınbasarı I.Jaksimovlar Nókis qalalıq 38-sanlı, 6-sanlı hám 32-sanlı ulıwma bilim beriw mekteplerinde bolıp, 4-kurs studentleriniń ámeliyat barısın kózden ótkerdi hám aldaǵı waqıtları isleniwi tiyis bolǵan wazıypalar boyınsha juwapker pedagog-xızmetkerler menen sáwbetleslar alıp bardı.

Ellikqala pedagogika fakulteti dekanı J.Allanazarov basshılıǵında rayondaǵı 21-sanlı ulıwma bilim beriw mektebinde ilaj ótkerildi.