NMPIde jańa oqıw jılınıń ashılıwına baǵıshlanǵan ilaj ótkerildi: Studentlerge gúwalıqlar tapsırıldı
Búgin, 7-sentyabr kúni Ájiniyaz atındaǵı Nókis mámleketlik pedagogikalıq institutında jańa 2022-2023-oqıw jılınıń saltanatlı ashılıwına baǵıshlanǵan ilaj bolıp ótti.
Ilajǵa baslanıp atırǵan oqıw jılında institutqa studentlikke qabıl etilgen jaslar, olardıń ata-anaları, professor-oqıtıwshılar, fakultet dekanları, máhállelerdegi nuranıylar, keń jámiyetshilik hám ǵalaba xabar quralları wákilleri qatnastı.
Saltanatlı ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajda institut rektorı Bayrambay Otemuratov sózge shıǵıp, derlik 90 jıllıq tariyxı hám joqarı bilimlendiriw tarawında óz qádiriyatlarına iye bolǵan pedinstitut bosaǵasınan atlap, oqıwǵa qabıl etilgen studentlerdi qutlıqladı hám olardıń oqıwlarında tabıslar tiledi.
Bıyılǵı oqıw jılında Nókis mámleketlik pedagogikalıq institutı bakalavriatınıń kúndizgi, sırtqı hám keshki tálim baǵdarların birinshi belgilep, dizimnen ótken abiturientler 32 mıńnan aslamdı quraǵan bolsa, sonnan 3 mıńǵa shamalas abiturient studentler qatarına qabıl etildi.
Institutta jańa oqıw jılına qızǵın tayarlıqlar kórildi. Auditoriyalar, laboratoriyalar, málimleme-resurs hám informaciyalıq texnologiyalar orayları, sport zalları hám maydanshaları oqıw procesine tolıq tayar halǵa keltirildi. 5-sentyabr kúni Ǵárezsizlik sabaqları menen baslanǵan oqıw procesi búgingi kúnde belgilengen joba boyınsha ámelge asırılmaqta.
Ilajda Ózbekstan xalıq jazıwshısı, Qaraqalpaqstan xalıq shayırı Keńesbay Kárimov, professor Qutlımurat Qoщanov, institutqa joqarı ball toplap, sonday-aq, belgilengen jeńillikler menen oqıwǵa qabıl etilgen studentler, olardıń ata-anaları sózge shıǵıp, baslanıp atırǵan oqıw jılınıń hár jılǵıdan da tabıslı, áwmetli keliwine tileklesligin bildirdi.
– Instituttıń mektepke shekemgi tálim baǵdarına hújjet tapsırıp, test imtixanlarınıń nátiyjelerine muwapıq 180,5 ball topladım hám mámleketlik grant tiykarında oqıwǵa qabıl etildim. Ata-anama, ustazlarıma sheksiz minnetdarman. Institutta oqıwdı basladıq. Aldaǵı waqıtlarda ustazlarımızdan bilim hám ilim sırların tereń meńgerip, úlken nátiyjelerge erisiwdi maqset etkenmen, – deydi institutqa eń joqarı ball menen kirgen Kamila Jaybergenova.
Ilaj dawamında joqarı ball toplap, student bolǵan jaslarǵa jańa oqıw jılınıń simvolikalıq gilti hám studentlik gúwalıqları tapsırıldı.
NMPI baspasóz xızmeti.