Xabarıńız bar, usı jıldıń 5-sentyabr kúninen baslap Ájiniyaz atındaǵı Nókis mámleketlik pedagogikalıq institutında jańa 2022-2023-oqıw jılı baslandı.

Institutta oqıw jılınıń dáslepki kúnlerinen baslap barlıq studentler, sonıń ishinde, 1-kursqa qabıl etilgen jaslar arasında úgit-násiyat hám túsindiriw jumısları alıp barılmaqta.

Dene mádeniyatı fakulteti tyutorları instituttıń studentler turaq jayında jasaytuǵın studentler halınan xabar alıp, olarǵa bul jerdegi barlıq sharayatlar, bes baslama tiykarında jumıs islep turǵan dógerekler, sonday-aq, instituttıń ishki tártip-qaǵıydaları haqqında maǵlıwmatlar berdi.

Baslawısh tálim, Fizika-matematika hám Shet tilleri fakultetleri tyutorları tálim baǵdarlarına 1-kursqa qabıl etilgen studentler menen instituttıń málimleme-resurs orayına sayaxatlar shólkemlestirdi. Oray qánigeleri bul jerdegi jaratılǵan sharayatlar, oqıw zalları, kitaplar fondı, gazeta hám jurnallar, elektron resurslar haqqında student-jaslarǵa tolıq maǵlıwmatlar berdi.

Fizika-matematika fakulteti dekanı orınbasarı X.Esemuratov hám tyutor I.Embergenovalar tárepinen fakultettiń 1-kurs studentlerine ijara shártnaması, instituttıń ishki tártip-qaǵıydaları haqqında túsinikler berip, Internet hám sociallıq tarmaqlardan óz ornında hám nátiyjeli paydalanıw boyınsha pikirlesiwler alıp bardı.

Mektepke shekemgi tálim fakulteti tyutorı G.Artikova ózine biriktirilgen 1-kurs studentleri menen Qaraqalpaqstan Respublikası málimleme-kitapxana orayına sayaxat shólkemlestirdi. Studentler oraydaǵı kitaplar, gazeta-jurnallar, elektron resurslardan turaqlı paydalanıw ushın orayǵa aǵza boldı. Sonday-aq, ashıq esikler kúni sheńberinde ótkerilgen shayır hám dramaturg K.Raxmanovtıń 80 jıllıǵına arnalǵan ádebiy keshege qatnastı.