ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

«4+2» baǵdarlaması boyınsha ámeliyat jumısları dawam etpekte

Aldın xabar bergenimizdey, Ózbekstan Respublikası Prezidentiniń «Pedagogikalıq bilimlendiriw sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları haqqında»ǵı qararına muwapıq, 2022-2023-oqıw jılınan baslap pedagog kadrlar tayarlaytuǵın joqarı oqıw orınlarınıń kúndizgi bilimlendiriw formasında oqıp atırǵan 2-4-kurs studentleri ushın háptelik oqıw shınıǵıwları «4+2» tártibinde, yaǵnıy, sabaqlardıń 4 kúni joqarı oqıw ornında, 2 kúni mektepke shekemgi hám ulıwma orta bilim beriw mákemelerinde ámeliyat ótew tártibinde alıp barılıwı belgilengen edi.

Usı qarar tiykarında NMPIde studentlerdiń ámeliyat procesi nátiyjeli shólkemlestirilmekte.

Mektepke shekemgi tálim fakulteti oqıtıwshıları R.Nurjanova hám A.Saparovlar tárepinen paytaxtımızdaǵı 38-sanlı ulıwma bilim beriw mektebinde defektolog qánigeler menen ushırasıw ótkerildi.

Tábiyǵıy pánler fakulteti professor-oqıtıwshıları tárepinen fakultet studentleri 7-, 23-, 32-, 33-, 38- hám 42-sanlı ulıwma bilim beriw mekteplerine alıp barılıp, jańa baǵdarlama boyınsha ámeliyat ótew barısı túsindirildi.

Túrkiy tiller fakulteti qaraqalpaq tili hám ádebiyatı tálim baǵdarınıń 2-B toparı studentleri Nókis qalasındaǵı 10-sanlı ulıwma bilim beriw mektebinde óz ámeliyat jumısların basladı. Studentler bul jerge barıp, mekteptegi kitapxana, sport zal, oqıw xanalarında jaratılǵan sharayatlar menen tanısıp, óz ámeliyat jumıslarına kiristi.

Jańa baǵdarlama boyınsha oqıtıw hám ámeliyat jumısları dawam etpekte.