ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Studentler turaq jayında jasaytuǵın qızlar menen sáwbetlesiw ótkerildi

Ájiniyaz atındaǵı Nókis mámleketlik pedagogikalıq institutı studentler turaq jayında jasaytuǵın student-qızlar menen sáwbetlesiw, olardıń mashqalaların úyreniw hám pikir-usınısların tıńlaw maqsetinde ushırasıw shólkemlestirildi.

Ilajǵa STJda jasaytuǵın barlıq student-qızlar, hayal-qızlar másláhát keńesiniń juwapkerleri, dekanlardıń jaslar máseleleri boyınsha orınbasarları, profilaktikalıq inspektorlar, pedagog-tárbiyashılar, tyutorlar hám tiyisli juwapker qánigeler qatnastı.

Ushırasıwda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov sózge shıǵıp, institut studentler turaq jayına birinshi gezekte «Temir dápter», «Hayallar dápteri», «Jaslar dápteri»ne kirgizilgen, sociallıq járdemge mútáj shańaraqlardıń perzentleri ornalastırılǵanı, házirgi waqıtta STJda 560 student-qız tolıq jaylasıp, olarǵa barlıq sharayatlar jaratılıp atırǵanlıǵın atap ótti.

Sonıń menen birge, STJda ornatılǵan ishki tártip-qaǵıydalarǵa, etikalıq júris-turıs normalarına ámel etiw, studentlerdiń qáwipsizligin támiyinlew, bos waqıtların mazmunlı ótkeriw maqsetinde qosımsha dógereklerdiń jumısların jolǵa qoyıw hám basqa sharayatlardı jaratıw boyınsha tiyisli juwapkerlerge wazıypalardı bólistirdi.

Óz gezeginde, studentler usınday imkaniyatlar hám sharayatlar jaratıp berip atırǵanı ushın institut jámáátine minnetdarshılıq bildirip, ózleriniń pikir-usınısların aytıp ótti.

Ushırasıwda student-jaslar arasında sociallıq-psixologiyalıq ortalıqtı jaqsılaw, olardıń bir-birine bolǵan doslıq, miyirmanlıq sezimlerin qollap-quwatlaw baǵdarında birgelikte ámelge asırılatuǵın jumıslar belgilep alındı.

NMPI baspasóz xızmeti.