Ájiniyaz atındaǵı Nókis mámleketlik pedagogikalıq institutında student-qızlar arasında jınayatshılıq hám huqıqbuzarlıqlardıń aldın alıw, olardı zıyanlı illetler, ǵalabalıq mádeniyattıń keri tásirlerinen qorǵaw máselelerine arnalǵan ushırasıw keshesi bolıp ótti.

Ilajǵa fakultet dekanlarınıń hayal-qızlar máseleleri boyınsha másláhátshileri, proliktikalıq inspektorlar, professor-oqıtıwshılar, student-qızlar, sonday-aq, tiyisli taraw qánigeleri qatnastı.

Ushırasıwda institut rektorınıń hayal-qızlar máseleleri boyınsha másláhátshisi S.Bekchanova, profilaktikalıq inspektor, leytenant M.Narımbetova, Din isleri boyınsha komitetiniń Qaraqalpaqstan Respublikası aymaqlıq basqarmasınıń hayal-qızlar máseleleri boyınsha bas qánigesi B.Ayımbetova, qánige Sh.Matyakubova, Qaraqalpaqstan Respublikası Ishki isler ministrligi qánigesi A.Bekchanovlar sózge shıǵıp, kún tártibindegi máseleniń áhmiyeti, student-qızlar arasında bunday unamsız háreketlerdiń aldın alıw, sonıń menen birge, olardıń oqıw hám jámiyetlik orınlarda etika normalarına ámel etiwi, kiyiniw mádeniyatı haqqında bahalı pikirlerin bildirdi.

Student-qızlar kóterilgen máseleler boyınsha óz pikirleri hám usınısların bildirip, ózlerin qızıqtırǵan sorawlarǵa juwaplar aldı.

NMPI baspasóz xızmeti.