Qaraqalpaqstan Respublikasında jaslardıń sociallıq-ekonomikalıq mashqalaları, olardıń pikir hám usınısların úyreniw, olarǵa birgelikte sheshim tabıw maqsetinde bir qatar unamlı jumıslar ámelge asırılmaqta.

Atap aytqanda, usı baǵdarda islep shıǵılǵan hám ámelge asırılǵan «Nókis qalası tájiriybesi» qaraqalpaqstanlı jaslar turmısında úlken áhmiyetke iye boldı.

Jaslar isleri agentligi Qaraqalpaqstan Respublikası basqarması málimleme xızmetiniń bizge xabar beriwinshe, usı tiykarda paytaxtımız Nókis qalasında jaslar jetekshileri menen birgelikte 64 mákan puqaralar jıyınında úyme-úy júriw arqalı xatlaw jumısları ótkerilip, 14-30 jastaǵı 75 mıńǵa shamalas jaslardıń balansı tolıq qáliplestirildi.

Jaslar balansı tiykarında anıqlanǵan hár on besinshi jumıssız hám sociallıq qorǵawǵa mútáj bolǵan 4820 jas 19 túrdegi járdem boyınsha «Jaslar dápteri» elektron platformasına kirgizildi.

Solay etip, Nókis qalasında Jaslar isleri agentligi Qaraqalpaqstan Respublikası basqarması tárepinen «Jaslar dápteri»ne kirgizilgen jaslarǵa ámeliy járdem beriw, olardıń sociallıq-ekonomikalıq mashqalaların sheshiw jumısları baslap jiberildi.

Agentlik qarjıları esabınan 311 jastıń mobilizaciyalıq shaqırıw rezervindegi xızmeti tólemi, 176 jastıń transport basqarıw gúwalıǵın alıw ushın oqıw kurslarınıń qárejetleri ushın jámi 2,2 milliard sum qarjı ajıratıldı.

Sonday-aq, «Jaslar dápteri»ndegi 677 jasqa ózin-ózi bánt etiw maqsetinde subsidiya tiykarında kiyim tigiw, qurılıs-ońlaw hám basqa da jumıslarda paydalanılatuǵın ásbap-úskeneler tapsırıldı.

Joqarı oqıw orınlarında oqıp atırǵan, «Jaslar dápteri»ne kirgizilgen qaraqalpaqstanlı jaslardan 833 studenttiń 3,7 milliard sumlıq tólemli kontrakt pullarınıń tólep berilgenligi bıyılǵı jılı mámleketimiz tárepinen qaraqalpaq jasları ushın keń kólemli imkaniyatlar jaratılıp atırǵanlıǵınıń ayqın dálili boldı.