Elimizde zıyalılar bayramı – 1-oktyabr – Muǵallimler hám ustazlar kúni múnásibeti menen tarawda jemisli miynet etip atırǵan barlıq muǵallimler, ustaz hám oqıtıwshılar, pedagog xızmetkerler qatnasıwında hár qıylı bayram ilajları, sıylıqlaw máresimleri bolıp ótpekte.

Búgin Ájiniyaz atındaǵı Nókis mámleketlik pedagogikalıq institutında ótkerilgen ilajda institutta jas áwlad tárbiyası, ilim hám bilimlendiriwde, jámiyetlik jumıslarda ayrıqsha belsendilik kórsetip kiyatırǵan bir topar professor-oqıtıwshılar jáne pedagog xızmetkerlerge húrmet kórsetildi.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov sózge shıǵıp, jıynalǵanlardı Muǵallimler hám ustazlar kúni menen institut rektoratı jámááti atınan qutlıqladı.

Házirgi waqıtta institutta 600 ge shamalas professor-oqıtıwshılar jaslarǵa tálim-tárbiya berip kelmekte. Olar ilim hám bilimlendiriwde jańadan-jańa nátiyjelerdi qolǵa kirgizip, joqarı bilimli pedagog kadrlardı tayarlawda ayanbay miynet etpekte.

Ilajda sońǵı jıllarda elimizde muǵallimler, ustaz hám oqıtıwshılarǵa bolǵan itibar jáne ǵamqorlıqlar, olarǵa múnásip jumıs hám turmıslıq sharayatlardıń jaratılıp berip atırǵanlıǵı, ásirese, bilimlendiriw tarawında professor-oqıtıwshılardıń miynet haqıları kóbeytilip, ilim menen shuǵıllanıwı, shákirtler tayarlawına ayrıqsha itibar qaratılǵanlıǵı, bárqulla húrmet hám izzetke bólenip atırǵan oqıtıwshılar búgingi kúnde elimizdiń rawajlanıwına múnásip úles qosıp kiyatırǵanlıǵı atap ótildi.

Ilajda bayram múnásibeti menen institut rektoratı hám kásiplik awqamı komiteti tárepinen tayarlanǵan sawǵalar pidayı hám jankúyer kásip iyelerine tapsırıldı.

Óz gezeginde, taraw wákilleri bunday itibar hám xoshametler ushın institut rektoratı jámáátine minnetdarshılıq bildirdi.

NMPI baspasóz xızmeti.