Ájiniyaz atındaǵı Nókis mámleketlik pedagogikalıq institutında jaslar tárbiyası hám olardıń ruwxıy dúnyasın bunnan bılay da jetilistiriw baǵdarında ámelge asırılatuǵın áhmiyetli máselelerge baǵıshlanǵan jıynalıs bolıp ótti.

Jıynalısqa fakultet dekanlarınıń orınbasarları, profilaktikalıq inspektorlar, tyutorlar hám studentler keńesiniń jetekshileri qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Atap ótilgenindey, sońǵı jıllarda elimizde jaslarǵa baylanıslı mámleketlik siyasatta úlken tariyxıy ózgerisler júz berip atırǵan bolıp, bunda Prezidentimiz tárepinen alǵa súrilgen «Bes áhmiyetli baslama»nıń jaslardıń ruwxıy, fizikalıq hám aqılıy potencialın júzege shıǵarıwdaǵı áhmiyeti joqarı bolmaqta.

Kún tártibindegi usınday wazıypalardan kelip shıǵıp, institutta basshı xızmetkerler basshılıǵında «Jaslardıń ruwxıy dúnyasın bunnan bılay da jetilistiriw hám Prezidentimiz tárepinen alǵa súrilgen Bes áhmiyetli baslama» sheńberindegi ilajlardı ámelge asırıwǵa baǵdarlanǵan Bas reje islep shıǵıldı.

Bas rejede student-jaslardıń «Bes baslama» sheńberindegi qızıǵıwshılıqları, qábileti hám baslamalarınan kelip shıqqan halda monitoring jumısların alıp barıw, usıdan kelip shıǵıp tájiriybeli professor-oqıtıwshılar hám qábiletli studentler basshılıǵında jańa strukturalar, dógereklerdiń jumısların jolǵa qoyıw hám studentlerdi olarǵa qamtıp alıw, sonday-aq, usı strukturalardıń qánigelesiwinen kelip shıǵıp jaslar arasında turaqlı túrde hár qıylı ruwxıy-aǵartıwshılıq, kórkem-ádebiy, psixologiyalıq, intellektual oylaw hám logikalıq pikirlew qábiletlerin jetilistiriwge baǵdarlanǵan ámeliy jumıslardı alıp barıw názerde tutılǵan.

Prorektor Q.Qodirov Bas rejedegi hár bir baǵdar hám olardı ámelge asırıw mexanizmleri boyınsha jıynalǵanlarǵa tolıq maǵlıwmatlar berip ótti.

Ilajda dekan orınbasarları hám tyutorlar sózge shıǵıp, Bas rejedegi kórsetilgen hár bir bánttiń jaslar tárbiyasındaǵı oǵada áhmiyetli ekenligin atap ótip, óz pikir hám usınısların bildirdi.

Jıynalısta Bas reje tiykarında ámelge asırılatuǵın jumıslar belgilep alındı.

NMPI baspasóz xızmeti.