ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Joqarı bilimlendiriw shólkemlerinde aralıqtan oqıtıwdı engiziw tártibi belgilendi

Ózbekstan Respublikası Ministrler Kabinetiniń 2022-jıl 3-oktyabrdegi 559-sanlı qararına muwapıq, «Joqarı bilimlendiriw shólkemlerinde aralıqtan oqıtıwdı engiziw ilajları haqqında»ǵı reje tastıyıqlandı.

Reje tiykarında aralıqtan oqıtıw arqalı joqarı bilimlendiriw shólkemlerinde bakalavriat hám magistratura basqıshlarında kadrlardı tayarlawdı shólkemlestiriw tártibi belgilendi.

Bunıń ushın bilimlendiriw shólkeminde tómendegiler bolıwı talap etiledi:

– aralıqtan oqıtıwdı basqarıw ushın «Learning Management System» platforması;
– internetke jalǵanıw hám paydalanıw ushın informaciyalıq-kommunikaciyalıq infrastruktura;
– oqıw jılı ushın belgilengen oqıw kontenti;
– pánlerdiń elektron oqıw-metodikalıq kompleksleri jáne ilimiy hám oqıw ádebiyatlarınıń elektron bazası;
– kompyuter texnikası menen úskenelengen óz aldına imarat yamasa auditoriyalar;
– texnikalıq hám programmalıq komponentlerdiń islewin támiyinleytuǵın injener-texnik xızmetkerler;
– bilimlendiriw shólkemine tiyisli bolǵan, mámleket aymaǵında jaylasqan server qurılması;
– bilimlendiriw shólkemi haqqındaǵı barlıq maǵlıwmatlar ornalastırılǵan rásmiy veb-bet.

Aralıqtan oqıtıwdı engiziw múmkin bolmaǵan bakalavriat tálim baǵdarları hám magistratura qánigelikleri hár jılı 1-aprelge shekem járiyalanadı.

Aralıqtan oqıtıw tiykarında kadrlar tayarlawda bir bakalavriat tálim baǵdarı 300 student, bir magistratura qánigeligi 30 studentten aslam bolmawı kerek.

Bunda:

– bul talap informaciyalıq-kommunikaciyalıq texnologiyalar baǵdarlarına engizilmeydi;
– studentlerdiń sanın anıqlawda sırt mámleket puqarası bolǵan studentler esapqa alınbaydı.

Aralıqtan oqıtıwda oqıwǵa qabıl etilgen student tómendegi jaǵdaylarda joqarı bilimlendiriw shólkemine keliwi shárt:

– oqıw procesi baslanıwınan aldın – LMS platformasınan dizimnen ótiw ushın;
– hár semestr juwmaǵında – juwmaqlawshı qadaǵalawdan ótiw ushın.

Sonday-aq, juwmaqlawshı mámleketlik attestaciyası, pitkeriw qánigelik hám magistrlik jumısı qorǵawı tikkeley joqarı bilimlendiriw shólkeminde dástúriy tárizde ámelge asırıladı, olardı sinxron yamasa asinxron rejiminde qabıllawǵa jol qoyılmaydı.

Aralıqtan oqıtıw tólemli kontrakt tiykarında ámelge asırıladı.

Islam Matekov,
Qaraqalpaqstan xabar agentliginiń sholıwshısı.