ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Rayonlarda «Jaslar dápteri»ne kirgizilgen studentlerge kontrakt tóleminiń yarımı tólep berildi

Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikasınıń barlıq rayonlarında «Jaslar dápteri»ne kirgizilgen, joqarı oqıw orınlarında tólemli kontrakt tiykarında oqıp atırǵan jaslar menen ushırasıw bolıp ótti. Bul haqqında Jaslar isleri agentligi QR basqarması málimleme xızmeti xabar berdi.

Ilajǵa joqarı oqıw orınlarınıń basshıları, studentlerdiń ata-anaları qatnastı.

Ushırasıwdı Jaslar isleri agentligi direktorınıń orınbasarı F.Ablayarov ashıp berdi hám Prezidentimiz tárepinen jaslarǵa berilip atırǵan imkaniyatlar haqqında aytıp ótti.

Atap ótiw kerek, 2022-2023-oqıw jılında paytaxtımız Nókis qalasınan bolǵan, «Jaslar dápteri»ne kirgizilgen 833 studenttiń 3,7 milliard sumlıq tólemli kontrakt pulları tólep berilgen bolsa, búgin rayonlarda jasaytuǵın hám usı kategoriyadaǵı student-jaslardan 675 ine usınday imkaniyat inám etilmekte.

Ilajda agentliktiń rayonlıq bólimleriniń baslıqlarına studentlerdiń kontrakt tólemleriniń 50 procenti tólep berilgenligi haqqındaǵı vaucherler saltanatlı túrde tapsırıldı.

Ushırasıwda student-jaslar da sózge shıǵıp, mámleketimiz tárepinen kórsetilip atırǵan bunday itibar hám ǵamqorlıqlar ushın Prezidentimizge, húkimet basshılarına tereń minnetdarshılıqların bildirdi.

Qaraqalpaq estradasınıń jas hám talantlı wákilleri, kórkem óner sheberleriniń atqarıwındaǵı koncert baǵdarlaması jıynalǵanlardıń názerine usınıldı.

Ilajǵa Qaraqalpaqstan Respublikası Ministrler Keńesi Baslıǵınıń orınbasarı Abatbay Daniyarov qatnastı.

Qaraqalpaqstan xabar agentligi.