Ájiniyaz atındaǵı Nókis mámleketlik pedagogikalıq institutında Ózbekstan jaslar awqamı baslanǵısh shólkeminiń ótken oqıw jılı dawamında alıp barǵan jumısların dodalaw, aldaǵı islenetuǵın jumıslardı belgilep alıwǵa baǵıshlanǵan esap beriw hám saylaw májilisi bolıp ótti. Ilaj baslanǵısh shólkem aǵzalarınıń jetiskenlikleri sáwlelengen kórgizbe menen baslandı.

Búgingi kúnde institutta 18 500 den aslam student oqıp atırǵan bolıp, sonnan 30 jasqa tolmaǵan 13 462 student jaslar awqamınıń aǵzaları bolıp esaplanadı. Institut baslanǵısh shólkemine 9 526 jas aǵzalıqqa qamtıp alınǵan bolıp, ótkerilgen májiliske olardan 100 delegat qatnastı.

Májiliske instituttıń jaslar máseleleri hám ruwxıy-aǵartıwshılıq bólimi baslıǵı Baxtıyar Bekmuratov basshılıq etti.

Kún tártibine muwapıq májiliste baslanǵısh shólkem tárepinen 2021-2022-oqıw jılında alıp barılǵan jumıslar, jaslar awqamı Keńes aǵzaların hám Nókis qalalıq konferenciyasına qatnasatuǵın delegatlardı saylaw, sonday-aq, jaslar awqamı institut baslanǵısh shólkeminiń jetekshisin saylaw máseleleri kórip shıǵılıwı belgilendi.

Atap ótilgen birinshi másele boyınsha institut jaslar jetekshisi Bayrambay Gúlimbetov maǵlıwmat berip ótken bolsa, ekinshi másele boyınsha institut jaslar awqamı baslanǵısh shólkeminiń 15 aǵzası saylandı. Sonday-aq, awqamnıń Nókis qalalıq konferenciyasına qatnasıw ushın 3 delegat saylap alındı.

Kún tártibindegi tiykarǵı másele esaplanǵan jaslar awqamı institut baslanǵısh shólkemi jetekshiligine usınılǵan 3 talabannıń ómirbayanları, miynet jolı hám aldaǵı jobaları haqqında maǵlıwmatlar berildi.

Májiliske qatnasıwshı delegatlar tárepinen talabanlar arasınan dawıs beriw jolı arqalı institut jaslar jetekshiligine Gúlimbetov Bayrambay Dáwletbaevich saylandı.

Maǵlıwmat ornında atap ótiw kerek, B.Gúlimbetov 2010-jılı instituttıń bakalavriatura, 2018-jılı magistratura basqıshın pitkergen. 2010-2019-jıllar aralıǵında institutta bir qatar juwapkerli wazıypalardı atqarıp kelgen bolsa, 2019-jıldan berli instituttıń jaslar awqamı jetekshisi bolıp jumıs islemekte.

Májiliste delegatlar sózge shıǵıp, búgingi saylanǵan jaslar jetekshisine kelesi jumıslarında tabıslar tiledi.

NMPI baspasóz xızmeti.