Bıyılǵı jılı 1-kursta oqıp atırǵan, ijarada jasaytuǵın studentlerge, burınǵısınan ózgeshe tárizde, sentyabr hám oktyabr ayları ushın ijara tóleminiń 50 procenti – Tashkent qalasında bazalıq esaplaw muǵdarınıń 1 esesine shekem (házirgi waqıtta 300 mıń sum), basqa aymaqlarda bolsa bazalıq esaplaw muǵdarınıń 0,5 esesine shekem (házirgi waqıtta 150 mıń sum) hesh qanday ijara shártnaması talap etilmesten tólep beriledi. Ijara shártnamasın usınǵan studentlerge noyabr ayınan tólemler dawam ettiriledi. Bul haqqında Jaslar isleri agentligi direktorı Alisher Sadullaev óz kanalında málim etti.

Esletip ótemiz, Ózbekstan Respublikası Ministrler Kabinetiniń 2021-jıl 24-sentyabrdegi «Ijara huqıqı tiykarında jasap atırǵan studentler tárepinen tólenetuǵın ijara tólemlerin qaplap beriw sistemasın engiziw ilajları haqqında»ǵı qararına muwapıq, 2021-jıl 1-maydan baslap jataqxana menen qamtıp alınbaǵan hám ózine, sonıń ishinde, ata-anasına (nızamlı wákillerine) tiyisli bolmaǵan jayda ijara huqıqı tiykarında jasaytuǵın mámleketlik joqarı oqıw orınları studentleriniń 60 procentine olar tárepinen tólenetuǵın aylıq ijara tóleminiń 50 procenti Ózbekstan Respublikasınıń Mámleketlik byudjeti esabınan qaplap beriliwi belgilengen.

Usı imkaniyattan paydalanıw ushın ijarada jasaytuǵın studentler ózi oqıp atırǵan fakultet dekanınıń jaslar menen islesiw boyınsha orınbasarı yamasa joqarı oqıw ornınıń studentlerdi turaq jay menen támiyinlew jumısların muwapıqlastırıw bólimine múrájat etiwi múmkin.

Islam Matekov,
Qaraqalpaqstan xabar agentligi.