Xabarıńız bar, Mámleketlik test orayı tárepinen 2022-jıldıń 3-7-oktyabr kúnleri 2022-2023-oqıw jılı ushın professional bilimlendiriw mákemelerine (kolledj hám texnikumlarǵa) kiriw test sınaqları ótkerildi.

Bunda talabanlardıń test sınaǵında toplaǵan balları test sınaǵı ótkerilgen kúnniń erteńine my.dtm.uz saytında járiyalanıp barıldı.

Búgin, 15-oktyabr kúni bolsa usı test sınaǵınıń juwmaqlawshı tańlaw nátiyjeleri járiyalandı. Bul haqqında Mámleketlik test orayı xabar berdi.

Talabanlar tańlaw nátiyjelerin my.dtm.uz saytı arqalı jeke kabinetinen bilip alıwı múmkin.

Sonday-aq, test sınaqları nátiyjesinen narazı bolǵan abiturient yamasa onıń ata-anası yaki bolmasa olardıń ornın basatuǵın adamlar (qáwenderler) eki kún dawamında professional bilimlendiriw mákemelerinde shólkemlestirilgen apellyaciya komissiyasına jazba yamasa elektron formada apellyaciyalıq arza beriw huqıqına iye.

Bunda apellyaciyalıq arza qabıl etilgeni haqqında abiturientke xabarlandırıw beriledi.

Apellyaciyalıq arzanı bergen abiturient xabarlandırıwda belgilengen kúni óziniń pasportı (tuwılǵanlıǵı haqqındaǵı gúwalıǵı) hám abiturient ruxsatnaması menen keliwi shárt.

Apellyaciyalıq arza eki jumıs kúninde apellyaciya komissiyası tárepinen abiturienttiń jazba juwapları tiykarında kórip shıǵıladı.

NMPI baspasóz xızmeti.