ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPI professor-oqıtıwshıları hám basqarıw tarawı wákilleri Qazan federal universiteti tájiriybesin úyrenbekte

Ájiniyaz atındaǵı Nókis mámleketlik pedagogikalıq institutınıń professor-oqıtıwshıları hám basqarıw tarawınıń wákilleri Rossiya Federaciyasınıń Qazan federal universitetinde tájiriybe almasıw boyınsha ámeliyat jumısların alıp barmaqta.

15 adamnan ibarat institut wákilleri universitettiń Psixologiya hám bilimlendiriw institutında ilimiy-izertlew, oqıw, sonday-aq, ilimiy maqalalardı baspaǵa tayarlaw baǵdarındaǵı jumıslardı joybarlastırıw hám ámeliyatqa engiziw boyınsha kompetenciyalardı ózlestirmekte, sonıń menen birge, Qazan federal universitetiniń aldınǵı tájiriybesi menen tanıspaqta.

– Qazan federal universiteti xalıqaralıq dárejedegi QS, THE, Scimago institutions ranking hám Raex reytinglerinde jetekshi orındı iyeleydi. Qaraqalpaqstanlı kásipleslerimiz akademiyalıq kórsetkishler hám maqalalardı baspaǵa tayarlaw, zamanagóy konferenciya maydanın shólkemlestiriw, sanlı texnologiyalardı engiziw hám jańa mashqalalardı esapqa alǵan halda oqıtıwshılardıń tájiriybesin arttırıw sistemasın jaratıw máseleleri menen qızıqsınıp atırǵanı da biykarǵa emes. Sonday-aq, ótiletuǵın pánler komponentine baylanıslı tańlaw moduli de usınılǵan bolıp, ámeliyat qatnasıwshıları universitet professor-oqıtıwshıları menen óz ara pikir almasadı, – dep aytıp ótti institut direktorınıń xalıqaralıq baylanıslar boyınsha orınbasarı Tatyana Baklashova.

Ámeliyat baǵdarlamasına muwapıq, NMPI oqıtıwshıları innovaciyalıq ideyalar aukcionında qatnasadı, ilimiy maqala joybarın islep shıǵadı, sanlı bilimlendiriw resursı ushın kontent toplaydı hám qorǵaw ushın daydjest tayarlaydı. Sonday-aq, universitet jumısları menen jaqınnan tanısıp, ilimiy hám oqıw oraylarında boladı hám studentler menen islesiwdiń tiykarǵı baǵdarların úyrenedi. Ámeliyat procesi dóńgelek stol formatındaǵı sáwbetlesiw menen juwmaqlanadı.

– Ótkerilip atırǵan tájiriybe almasıw NMPI hám QFU arasında dúzilgen uzaq múddetli birge islesiwdegi áhmiyetli joybar dep esaplayman, – deydi NMPI xalıqaralıq birge islesiw bóliminiń baslıǵı Alımjan Bimbetov. – Búgingi kúnde biziń tiykarǵı wazıypalarımızdıń biri institutımızdıń reytinglerdegi kórsetkishlerin arttırıw bolıp esaplanadı. Qazan federal universitetinde ótkerilip atırǵan ámeliyatımız dúnya júzilik reyting sistemalarınıń tiykarǵı kórsetkishleri esaplanǵan jańa akademiyalıq dárejege erisiw imkaniyatın beredi.

Tájiriybe almasıw formatındaǵı ámeliyat procesi 29-oktyabrge shekem dawam etedi.

NMPI baspasóz xızmeti.