Muqimiy atındaǵı Qoqand mámleketlik pedagogikalıq institutınıń bir topar belsendi studentleri búgin, 17-oktyabr kúni Ájiniyaz atındaǵı Nókis mámleketlik pedagogikalıq institutına kelip, bul jerdegi sharayatlar menen tanıstı.

«Jasıl mákan» ulıwma milliy joybarı tiykarında Qaraqalpaqstan Respublikasınıń Moynaq rayonı hám Nókis qalasına bolǵan sayaxatı dawamında ferǵanalı jaslar elimizde ámelge asırılıp atırǵan keń kólemli dóretiwshilik jumısları hám reformalardıń nátiyjelerine gúwa boldı.

Ferǵanalı studentler institut bas oqıw imaratınıń joybarı menen tanıstı. Olarǵa búgingi kúnde institutta jumıs islep atırǵan professor-oqıtıwshılar hám studentlerdiń ilimiy-pedagogikalıq jumısları haqqında maǵlıwmatlar berildi.

Sonıń menen birge, házirgi waqıtta 15 mıń atamadaǵı 157 mıńnan aslam kitap fondına iye bolǵan institutımızdıń málimleme-resurs orayında bolıp, bul jerdegi sharayatlarǵa joqarı baha berdi.

Bunnan soń Qoqand mámleketlik pedagogikalıq institutınıń jańadan shólkemlestirilgen «Xon» quwnaqlar hám ziyrekler komandası aǵzalarınıń soranıwına muwapıq, institutımızdıń maqtanıshı, respublikalıq «Quwnaqlar hám ziyrekler» tańlawınıń bir neshe márte chempionı hám super kuboginiń iyesi bolǵan «Turan» komandasınıń aǵzaları menen ushırasıw shólkemlestirildi.

Ushırasıwda komandanıń rejissyorı Dástan Bektursınov, aǵzaları Aziz Nazarov hám Baxtiyar Sháribaevlar ferǵanalı jaslarǵa «Quwnaqlar hám ziyrekler» tańlawında qatnasıw boyınsha bahalı pikirlerin, usınısların berip, tiyisli jol-jobalar kórsetti. Soraw-juwap formatında házil-dálkek, yumor-satiraǵa bay ótken ushırasıw qatnasıwshılarda úlken tásir qaldırdı.

Ushırasıw dawamında «Turan» komandası wákilleri tárepinen Ferǵanada Qaraqalpaqstan hám Ferǵana yumorına baǵıshlanǵan festival ótkeriw boyınsha usınıslar bildirildi. Bul usınıs miymanlarda da úlken qızıǵıwshılıq oyatıp, tez kúnlerde ámeliy jumıslar alıp barılıwı atap ótildi.

Ilajdan soń miymanlar institut jámáátine minnetdarshılıq bildirip, qaraqalpaq xalqı haqqındaǵı jaqsı tileklerin bildirdi.

NMPI baspasóz xızmeti.