Ájiniyaz atındaǵı Nókis mámleketlik pedagogikalıq institutınıń barlıq fakultetlerinde instituttıń profilaktikalıq inspektorı, kapitan Bahadır Masharipov, ishki isler uyımlarınıń tiyisli qánigeleri, Qaraqalpaqstan musılmanlar qazıyatı wákilleri, fakultet dekanlarınıń jaslar máseleleri hám ruwxıy-aǵartıwshılıq isleri boyınsha orınbasarları, sonday-aq, tyutorlar qatnasıwında student-jaslar menen ushırasıwlar ótkerildi.

Ótkerilgen ilajlarda taraw wákilleri sońǵı jıllarda elimizde jaslar siyasatına qaratılıp atırǵan itibar, olardıń oqıwı, bilim alıwı, ilim menen shuǵıllanıwı, kásip-óner iyelep, jámiyetimiz ushın paydalı jumıslar menen shuǵıllanıwı ushın sharayatlar, imkaniyatlar jaratılıp atırǵanlıǵın atap ótti.

Sonıń menen birge, institutta jaslardıń bos waqıtların mazmunlı ótkeriw, olardıń ruwxıy dúnyasın, kózqarasların bayıtıw, huqıqıy jaqtan sawatlı bolıp jetilisiwi, sport penen shuǵıllanıp, salamat turmıs tárizine ámel etiwin támiyinlew baǵdarında da nátiyjeli jumıslar alıp barılıp atırǵanlıǵı sóz boldı.

Soǵan qaramastan, student-jaslar arasında jınayatshılıq hám huqıqbuzarlıqlar júz berip atırǵanlıǵı, ayırım jaslardıń zıyanlı ádetler hám illetlerge berilip, keleshegine úlken keri tásir etip atırǵanlıǵı turmıslıq mısallar járdeminde túsindirildi.

Ushırasıwlarda bunday unamsız hádiyselerdiń aldın alıw ushın jaslardıń huqıqıy bilim hám kónlikpeleri joqarı bolıwı, bárqulla sergek bolıp, óz útinde mudamı islew, bilim hám tájiriybesin arttırıp barıwınıń áhmiyeti túsindirildi.

Ótkerilgen ushırasıwlar dawamında jaslar ózlerin qızıqtırǵan sorawlarına qánigelerden tolıq juwaplar aldı.

Jaslar arasında jınayatshılıq hám huqıqbuzarlıqlar profilaktikasına baǵıshlanǵan ilajlar institut boylap dawam etpekte.

NMPI baspasóz xızmeti.