Aldın xabar bergenimizdey, Ájiniyaz atındaǵı Nókis mámleketlik pedagogikalıq institutınıń barlıq fakultetlerinde korrupciyaǵa qarsı gúresiw boyınsha úgit-násiyat jumısları alıp barılmaqta.

Instituttıń Ellikqala Pedagogika fakultetinde ótkerilgen usınday ilajda Korrupciyaǵa qarsı gúresiw «Komplaens qadaǵalaw» sistemasın basqarıw bóliminiń baslıǵı Palmurza Xojabekov korrupciyaǵa qarsı gúresiw boyınsha qabıl etilgen nızamlar, shıǵarılǵan pármanlar hám qararlar haqqında túsinikler berip, institutta bul baǵdarda alıp barılıp atırǵan jumıslar haqqında aytıp berdi.

Oqıw processinde, seminarlar, imtixanlar waqtında korrupciyalıq jaǵdaylar júz beretuǵın bolsa bólimniń telefon nomerleri, Telegram-botların aytıp, berilgen xabarlar sır saqlanatuǵınlıǵın atap ótti. Jámiyetimizdegi bolıp atırǵan ózgerisler sheńberinde sáwbetler alıp barıldı, sol tiykarında kúndelikli ómirimizden mısallar keltirip ótildi. Ilajǵa Ellikqala Pedagogika fakultetinen 357 student, 5 professor-oqıtıwshı hám 2 tyutor qatnastı.

Sonday-aq, institutimızda «9-dekabr – Xalıqaralıq korrupciyaǵa qarsı gúresiw kúni»ne baǵıshlanǵan fakultetler aralıq tańlawlar, viktorinalar bolıp ótetuǵınlıǵı haqqında maǵlıwmatlar berildi hám tańlawǵa belsene qatnasıwǵa shaqırdı.

Ushırasıwda student-jaslar ózlerin qızıqtırǵan sorawlarǵa juwaplar aldı hám pikir-usınısların bildirdi.

Ilajǵa instituttıń oqıw isleri boyınsha prorektorı M.Jumamuratov qatnastı.

NMPI Korrupciyaǵa qarsı gúresiw «Komplaens qadaǵalaw» sistemasın basqarıw bólimi.