Xabarıńız bar, házirgi waqıtta Ájiniyaz atındaǵı Nókis mámleketlik pedagogikalıq institutınıń materiallıq-texnikalıq bazasın zamanagóy formatqa keltiriw maqsetinde jańa oqıw imaratları, laboratoriyalar hám studentler turaq jayları qurılısları dawam etpekte.

Qurılıs-rekonstrukciya jumısları alıp barılıp atırǵan obektlerde mámleketlik qadaǵalawdı bunnan bılay da kúsheytiw maqsetinde qurılıs firmaları hám joybarlastırıw institutları wákilleri qatnasıwında ushırasıw bolıp ótti.

Ilajdı instituttıń qarjı hám ekonomikalıq isleri boyınsha prorektorı Rashid Ibadullaev basqarıp bardı.

Ushırasıwda taraw wákilleri menen házirgi waqıtta qurılıs jumısları dawam etip atırǵan obektlerdi belgilengen múddetler sapalı etip tapsırıw, orın alıp atırǵan mashqalalar, olardı sheshiw boyınsha pikirler almasıldı.

Qurılıs tarawında mámleketlik qadaǵalaw inspekciyasınıń qánigesi Dáwletmurat Abdimuratov úyreniw jumıslarınıń nátiyjeleri haqqında maǵlıwmat berip, qurılıs firmaları tárepinen jumıslardıń barısın qadaǵalap barıw boyınsha islep shıǵılǵan jańa platforma haqqında maǵlıwmat berildi.

Qurılıs firmaları hám joybarlastırıw institutlarınıń juwaplı wákilleri jumıslardı jetilistiriw boyınsha óz usınısların bildirip, aldaǵı wazıypalardı dodaladı.

NMPI baspasóz xızmeti.