ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Ózbekstan-Rossiya úshinshi bilimlendiriw forumı sheńberinde áhmiyetli shártnamalarǵa qol qoyıldı

Usı jıldıń 26-27-oktyabr kúnleri Samarqand qalasında Ózbekstan-Rossiya úshinshi bilimlendiriw forumı bolıp ótpekte.

Samarqand mámleketlik universitetinde ótkerilip atırǵan bul abıroylı xalıqaralıq forumda eki mámleket tárepinen 200 den aslam joqarı oqıw orınlarınıń basshıları, óndirislik kompaniyalarınıń wákilleri, ministrlik hám mákemelerdiń juwapkerleri qatnaspaqta.

Forum sheńberinde eki mámlekettiń bilimlendiriw shólkemleri, jetekshi kompaniyaları arasında ilim, bilimlendiriw, óndirislik integraciyanı jolǵa qoyıw, sonday-aq, injenerlik texnologiyası, energetika, ximiya sanaatı tarawlarında kadrlar tayarlaw, qánigeligin jetilistiriw, ilimiy hám innovaciyalıq jumıslardaǵı birge islesiw baylanısların rawajlandırıw boyınsha sáwbetlesiwler ótkerilmekte.

Forumda Ájiniyaz atındaǵı Nókis mámleketlik pedagogikalıq institutınıń rektorı Bayrambay Otemuratov qatnasıp, Rossiyadaǵı jetekshi joqarı oqıw orınları menen birge islesiwdiń perspektivaları hám ilimiy-pedagogikalıq baylanıslardı bekkemlew boyınsha sáwbetlesiwler alıp bardı.

Forum sheńberinde dúnya júziniń jetekshi reyting shólkemleri tárepinen joqarı bahalanǵan Qazan federal universiteti, sonday-aq, Sibir federal universiteti menen eki tárepleme birge islesiw boyınsha shártnamalarǵa qol qoyıldı.

Ózbekstan-Rossiya úshinshi bilimlendiriw forumı dawam etpekte.

NMPI baspasóz xızmeti.