ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

«Jawızlıqqa qarsı – aǵartıwshılıq» atamasında úgit-násiyat ilajı bolıp ótti

Búgin, 27-oktyabr kúni Ájiniyaz atındaǵı Nókis mámleketlik pedagogikalıq institutında «Jawızlıqqa qarsı – aǵartıwshılıq» atamasında úgit-násiyat ilajı hám ushırasıw keshesi bolıp ótti.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ushırasıwǵa Nókis qalasındaǵı ál-Beruniy atındaǵı orta arnawlı islam oqıw ornınıń oqıtıwshısı J.Iskenderov, Qaraqalpaqstan musılmanları qazıyatınıń qazı járdemshisi T.Dosımbetova, Din isleri boyınsha komitetiniń Qaraqalpaqstan Respublikası aymaqlıq basqarmasınıń qánigesi B.Ayımbetova, Respublikalıq Ruwxıylıq hám aǵartıwshılıq orayı Nókis qalalıq bóliminiń baslıǵı Q.Nuratdinov, Nókis qalasındaǵı 4-sanlı ishki isler bólimi baslıǵınıń orınbasarı, podpolkovnik B.Matnazarov, sonday-aq, fakultet dekanlarınıń orınbasarları, profilaktikalıq inspektorlar, tyutorlar, jaslar awqamı hám studentler keńesiniń jetekshi studentleri qatnastı.

Ilajda sózge shıqqanlar atap ótkenindey, jawızlıq – bul ilimsizlik bolıp, ilimsiz hesh qashan rawajlanıwǵa erisip bolmaydı. Ózbekstan Respublikası Prezidenti Shavkat Mirziyoyev tárepinen islep shıǵılǵan «Rawajlanıw strategiyası»nda belgilep berilgen jeti baslı wazıypanıń besinshisinde usı máselege ayrıqsha toqtalıp, «Muqaddes islam dinimizdiń gumanistlik ideyaların úgit-násiyatlaw, «Jawızlıqqa qarsı – aǵartıwshılıq» principi tiykarında ósip kiyatırǵan jaslarımızdı salamat isenim ruwxında tárbiyalawǵa ayrıqsha áhmiyet qaratamız. Hámmemizge málim, Ózbekstan – úlken imkaniyat hám baylıqlarǵa iye mámleket. Biraq, bizlerdiń eń úlken baylıǵımız – hár qıylı millet hám xalıqlar, diniy konfessiyalar wákilleri arasındaǵı tınıshlıq hám turaqlılıq, óz ara húrmet jáne awızbirshilik bolıp esaplanadı», — dep aytıp ótken edi.

Haqıyqatında da, ótken qısqa dáwir ishinde jámiyetimizdiń baslı ólshemi ruwxıylıq hám muqaddes dinimizdiń gumanistlik ideyaların úgit-násiyatlaw, «Jawızlıqqa qarsı – aǵartıwshılıq» principi tiykarında úlken ózgerisler ámelge asırıldı.

Prezident Sh.Mirziyoyev BMSh Bas Assambleyasınıń 72-sessiyasında sońǵı jıllarda oǵada kúsheyip, dúnya xalqın táshwishke salıp atırǵan terrorizm hám ekstremizm qáwipleriniń áhmiyetin jawızlıq hám mawasasızlıq qurap atırǵanlıǵın atap ótip, bunday oǵada qáwipli illetke qarsı kúsh isletiw jolı arqalı emes, al basqa principler menen gúresiw hám tamırına balta urıwǵa, birinshi gezekte, jaslardıń sanası hám oy-pikirlerin aǵartıwshılıq ideyaları tiykarında qáliplestiriw arqalı kúshli immunitet jaratıw zárúrligine itibar qaratqan edi. Prezident óz bayanatında islam dininiń tiykarǵı áhmiyetin oǵada tereń túsindirip bergenligi de ayrıqsha dıqqatqa ılayıqlı. BMShtıń joqarı minberinde turıp birinshi márte aytılǵan islam dininiń jaqsılıq hám tınıshlıqqa, haqıyqıy insanıy pazıyletlerdi qásterlep-saqlawǵa shaqıratuǵın ullı din ekenligi haqqındaǵı pikirleri dúnya jámiyetshiligi tárepinen joqarı bahalandı.

Haqıyqatında da, ruwxıylıq hám aǵartıwshılıq jámiyettiń rawajlanıwı, milletti jetiklikke baǵdarlawshı hám adamlardıń kámil insan bolıwın belgilep beretuǵın tiykarǵı faktor bolıp tabıladı.

Óytkeni, ruwxıylıq rawajlanǵan jaǵdayda ǵana jámiyette ekonomikalıq hám jámiyetlik-siyasiy turaqlılıq boladı, aǵartıwshı, bilimli, ziyalı adamlar bar jerde mámleket hám millet rawajalandı.

Tilekke qarsı, mámleketimizde ámelge asırılıp atırǵan usınday reformalar hám tariyxıy jańalanıwlarǵa, jaslar ushın jaratılıp atırǵan imkaniyatlarǵa qaramastan terrorizm, ekstremizm hám usı sıyaqlı illetlerge bilip-bilmey aralasıp qalıp atırǵan jaslar da aramızda ushırasıp turıptı.

Házirgi waqıtta kóz aldımızda dúnyanıń túrli jerlerinde júz berip atırǵan ekonomikalıq hám sociallıq, málimleme-kommunikaciyalıq tarawlardaǵı ózgerisler, hár qıylı ideologiyalar soqlıǵısıwı keskin tús alıp atırǵan bir jaǵdayda, pikirge qarsı pikir, ideyaǵa qarsı ideya, jawızlıqqa qarsı aǵartıwshılıq penen gúresiw hár qashanǵıdan da úlken áhmiyetke iye bolmaqta.

Ótkerilgen ilajda jaslar arasında usınday baǵdardaǵı úgit-násiyat hám túsindiriw jumıslarınıń nátiyjeliligin arttırıw boyınsha pikirler bildirildi.

Sonday-aq, belsendi jaslar da sózge shıǵıp, jawızlıqqa qarsı – aǵartıwshılıq ideyaların jaslar arasında keń en jaydırıw maqsetinde ózleriniń pikir hám usınısların bildirip ótti.

NMPI baspasóz xızmeti.