Búgin, 31-oktyabr kúni Koreya Respublikasınıń Ózbekstan Respublikasındaǵı konsulı Na Donggun basshılıǵındaǵı delegaciya Ájiniyaz atındaǵı Nókis mámleketlik pedagogikalıq institutına keldi.

Ushırasıwda miymanlar institutta Koreya Respublikasınıń Ózbekstandaǵı Elshixanası menen birgelikte shólkemlestirilgen «Koreya múyeshi» ushın koreys tili hám ádebiyatı, tariyxı hám mádeniyatı haqqında baspadan shıǵarılǵan jańa kitaplardı sawǵa etti.

Instituttıń xalıqaralıq birge islesiw bólimi baslıǵı A.Bimbetov, koreys tili páni oqıtıwshısı, Qaraqalpaqstandaǵı Koreys milliy mádeniy orayınıń baslıǵı M.Kogay menen bolıp ótken sáwbetlesiw barısında elimizde koreys tili hám mádeniyatın úyreniw boyınsha ámelge asırılıp atırǵan jumıslar haqqında maǵlıwmatlar berildi.

Sonday-aq, Koreya Respublikasında jumıs alıp barıp atırǵan xalıqaralıq reyting shólkemleri tárepinen joqarı bahalanǵan oqıw orınları, ilimiy-izertlew orayları menen eki tárepleme baylanıslardı jolǵa qoyıw, ilimiy-ámeliy stajirovkalar, professor-oqıtıwshılardıń qánigeligin arttırıw, birgelikte magistratura qánigeliklerin ashıw baǵdarında ámelge asırılatuǵın jumıslar dodalandı.

Koreya Respublikasınıń konsulı Na Donggun instituttaǵı «Koreya múyeshi»niń jumısları jaqsı jolǵa qoyılǵanlıǵı, bul jerde koreys tili hám mádeniyatın úyreniw boyınsha ámelge asırılıp atırǵan jumıslarǵa joqarı baha berip, atap ótilgen máseleler boyınsha birge islesiwdiń perspektivaları haqqında óz usınısların bildirdi.

NMPI baspasóz xızmeti.