Búgin, 1-noyabr kúni Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası Ishki isler ministri, polkovnik Baxtiyar Tórebekovtıń student-jaslar menen ushırasıwı bolıp ótti.

Ushırasıwǵa fakultet dekanlarınıń orınbasarları, tyutorlar, professor-oqıtıwshılar, belsendi studentler, sonday-aq, ishki isler uyımlarınıń juwaplı xızmetkerleri, joqarı oqıw orınlarınıń profilaktikalıq inspektorları qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ushırasıwda ministr B.Tórebekov sózge shıǵıp, sońǵı jıllarda elimizde jaslarǵa baylanıslı mámleketlik siyasatta ámelge asırılıp atırǵan reformalar hám olardıń nátiyjeleri haqqında aytıp ótip, keleshek iyeleri bolǵan jaslarımızdıń arasında jınayatshılıq, huqıqbuzarlıq hám basqa da nızam buzıwshılıq jaǵdaylarınıń aldıp alıw baǵdarında ámelge asırılıp atırǵan jumıslar haqqında maǵlıwmatlar berdi.

Mámleketimizde kóp sanlı jaslardı óz ishine qamtıǵan joqarı bilimlendiriw sistemasınıń ózinde de jaslar máselesi kúnniń baslı temasına kóterildi. Olarǵa oqıw, bilim alıw, kásip-óner úyrenip, óz ústinde islep barıwı ushın múnásip sharayatlardı jaratıw, mashqalaların úyreniw hám birgelikte sheshim tabıw, jaslardıń ruwxıy-psixologiyalıq, sociallıq jaǵdayların baqlaw barıw maqsetinde barlıq joqarı oqıw orınlarında tyutor, psixolog, profilaktikalıq inspektor shtatları engizildi. Olardıń jumısları tikkeley student-jaslar menen islesiwden ibarat bolıp, bunday institutlardıń ámeliyatqa engiziliwi búgingi kúnde tarawda jaqsı nátiyjesin bermekte.

Degen menen, búgingidey globallasıw hám internet zamanında mámleketimiz keleshegi bolǵan jaslardı ózleriniń ǵárez niyetleri arqalı keri jollarǵa baslaw, jaslar qatnasıwında jınayatshılıq hám huqıqbuzarlıqlardı kóbeytiw arqalı ózleriniń maqsetlerine erispekshi bolıp atırǵan kúshler de joq emes. Ásirese, jaslardı óz izine ertip, urlıq, aldawshılıq, tonawshılıq, náshebentlik, hár qıylı psixotrop dáriler aylanısı sıyaqlı nızamǵa qayshı háreketlerdi islewge baǵdarlap atırǵanlar da ushırasıp turıptı.

Jaslar mámleketi sıpatında elimizde olardı bunday jat illetler hám nızamǵa qayshı háreketlerden saqlaw tek ǵana ishki isler yamasa usı sıyaqlı qáwipsizlik uyımlarınıń emes, nurlı keleshekti maqset etken hár bir taraw wákiliniń ádiwli wazıypası bolıp esaplanadı.

Ushırasıwda ministr B.Tórebekov elimiz jasları arasında ushırasıp atırǵan jınayatlar hám huqıqbuzarlıqlar haqqında maǵlıwmat berip, ilaj qatnasıwshıların profilaktikalıq ilajlarǵa belsene qatnasıp, átirapta júz berip atırǵan hár qıylı unamsız hám kewilsiz hádiyselerge biypárwa bolmastan, jámiyetlik qadaǵalawdı kúsheytiwdiń áhmiyeti joqarı ekenligin atap ótti.

Ilajda Qaraqalpaqstanda iyul ayı basında júz bergen waqıyalardıń aqıbetleri haqqında tayarlanǵan videorolik jıynalǵanlardıń itibarına usınıldı.

Ushırasıwda studentler jol-transport hádiyseleriniń, kiber jınayatlardıń aldın alıw, jaslar arasında alıp barılatuǵın úgit-násiyat ilajlarınıń nátiyjeliligin arttırıw, ministrlik penen birgelikte studentler qatnasıwında profilaktikalıq mazmundaǵı videorolikler tańlawların shólkemlestiriw sıyaqlı temalar boyınsha sorawlar hám pikir-usınısların bildirdi.

NMPI baspasóz xızmeti.