ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Rossiyanıń 6 aymaǵındaǵı ózbekstanlı studentlerge oqıwın kóshiriwge ruxsat berildi

Mámleketlik komissiyanıń tiyisli protokolına muwapıq, Rossiya Federaciyasınıń Kursk, Bryansk, Belgorod, Voronej, Rostov hám Krasnodar aymaqlarındaǵı joqarı oqıw orınlarında oqıp atırǵan Ózbekstan puqaralarınıń oqıwın Ózbekstandaǵı mámleketlik joqarı bilimlendiriw mákemelerine aldınǵısınan ózgeshe tárizde kóshiriwge ruxsat berildi. Bul haqqında Joqarı hám orta arnawlı bilimlendiriw ministrligi xabar berdi.

Protokol tiykarında:

– Studentlerdiń oqıwı olardıń arzalarına muwapıq turaqlı jasaw mánzili aymaǵında jaylasqan joqarı oqıw orınlarınıń sáykes hám túrles (sáykes hám túrles bolmaǵan jaǵdayda mazmunı boyınsha jaqın bolǵan) tálim baǵdarına kóshiriledi;

– Oqıwın kóshiriw boyınsha arzalar 2022-jıl 1-noyabrden 20-noyabrge shekem (sol kúni de) Mámleketlik test orayınıń my.dtm.uz saytı («Rossiya Federaciyasınan oqıwdı kóshiriw» bólimi) arqalı qabıl etiledi;

– Studentlerdiń oqıwın kóshiriwge ruxsat beriw boyınsha qarar respublikalıq joqarı oqıw orınlarınıń mákemelik boysınıwına qaramastan Joqarı hám orta arnawlı bilimlendiriw ministrligi tárepinen qabıl etiledi;

– Puqaralardıń Rossiyadaǵı belgili bir joqarı oqıw ornında haqıyqatında da oqıp atırǵanlıǵı anıqlanbasa, olardıń oqıwı kóshirilmeydi.

– Oqıwı kóshirilgen studentlerdiń oqıwın sáykes kurstan dawam etiwine aldınǵısınan ózgeshe tárizde ruxsat beriledi. Bunda anıqlanǵan pánlerdiń parqı 2022-2023-oqıw jılı dawamında biypul tapsırıladı.

Sonday-aq, qospa tálim baǵdarlamaları tiykarında joqarıda atap ótilgen aymaqlarda jaylasqan birge islesiwshi joqarı oqıw orınlarında bilim alıp atırǵan jáne 2022-2023-oqıw jılında jiberiliwi jobalastırılǵan studentler oqıwın olardıń arzalarına muwapıq belgili bir joqarı bilimlendiriw mákemesi sheńberinde sáykes (sáykes bolmaǵan jaǵdayda túrles) bakalavriat tálim baǵdarına (magistratura qánigeligine) kóshiriwge de ruxsat berildi.

Maǵlıwmat ornında atap ótiw kerek, Rossiya Federaciyasınıń Ukraina menen shegaralas bolǵan aymaqlarındaǵı joqarı oqıw orınlarında oqıp atırǵan bir topar ózbekstanlı studentler Prezidentke videomúrájat jollap, olardıń oqıwın Ózbekstanǵa kóshiriwge ámeliy járdem beriwin soraǵan edi.