Ájiniyaz atındaǵı Nókis mámleketlik pedagogikalıq institutı 2022-2023-oqıw jılınan baslap Malayziyanıń Lincoln University College oqıw ornı menen birgelikte bakalavriattıń «60110200 – Mektepke shekemgi tálim» kúndizgi bilimlendiriw baǵdarı boyınsha qospa tálim (Double Degree) baǵdarlamasın jolǵa qoyǵan edi.

Qospa tálim baǵdarlamasına birinshi basqıshta ana tili hám ádebiyatı, sonday-aq, biologiya pánlerinen ótkerilgen test sınaqlarınan tabıslı ótken abiturientler ushın búgin, 4-noyabr kúni institutta inglis tili páninen test sınaqları bolıp ótpekte.

Test sınaqları Mámleketlik test orayı Qaraqalpaqstan Respublikalıq bólimi qánigeleri tárepinen qadaǵalanbaqta.

Maǵlıwmat ornında atap ótiw kerek, institut tariyxında birinshi márte jolǵa qoyılıp atırǵan usı qospa tálim baǵdarlaması Ózbekstan Respublikası Prezidentiniń «Ózbekstan Respublikası joqarı bilimlendiriw sistemasın 2030-jılǵa shekem rawajlandırıw koncepciyasın tastıyıqlaw haqqında»ǵı hám «Joqarı hám orta arnawlı bilimlendiriw sistemasın basqarıwdıń jańa principlerin engiziw ilajları haqqında»ǵı qararlarında belgilengen wazıypalardan kelip shıǵıp, sonday-aq, Ózbekstan Respublikası hám sırt ellerdiń joqarı bilimlendiriw shólkemleriniń óz ara birge islesiwi boyınsha «Qospa tálim baǵdarlaması» tiykarında ámelge asırılmaqta.

Dúnya júziniń abıroylı reyting shólkemleri tárepinen «TOP-300»lik joqarı oqıw orınları qatarına kirgizilgen Lincoln University College oqıw ornı menen birgelikte jolǵa qoyılıp atırǵan qospa tálim baǵdarlaması bakalavriattıń «60110200 – Mektepke shekemgi tálim» kúndizgi bilimlendiriw baǵdarı boyınsha tólemli kontrakt tiykarında ámelge asırıladı. Bunda oqıw múddeti 3 jıl bolıp, oqıw procesi tolıq inglis tilinde ótkeriledi.

NMPI baspasóz xızmeti.