Ájiniyaz atındaǵı Nókis mámleketlik pedagogikalıq institutında «Mektepke shekemgi tálimge innovaciyalıq qatnas: mashqalalar hám sheshimler» atamasındaǵı respublikalıq ilimiy-teoriyalıq konferenciya bolıp ótti.

Instituttıń Mektepke shekemgi tálim fakulteti tárepinen shólkemlestirilgen ilajdıń ashılıw plenar májilisine Qaraqalpaqstan Respublikası Mektepke shekemgi bilimlendiriw ministri G.Baxieva, ministrliktiń metodist qánigeleri, professor-oqıtıwshılar, doktorantlar, magistrantlar hám student-jaslar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Konferenciyada atap ótilgenindey, mektepke shekemgi bilimlendiriw keleshek áwlad tárbiyasında tiykarǵı buwınlardıń biri bolıp esaplanadı. Sonlıqtan da, elimizde sońǵı jıllarda ámelge asırılıp atırǵan reformalar mektepke shekemgi bilimlendiriwdi túp-tiykarınan modernizaciyalawǵa baǵdarlanbaqta. Mámleketimizde usı tiykarda Mektepke shekemgi bilimlendiriw ministrligi shólkemlestirildi. Tarawdı bunnan bılay da rawajlandırıw maqsetinde 100 den aslam normativlik-huqıqıy hújjetler, sonıń ishinde, 3 nızam qabıl etildi.

Statistikalıq maǵlıwmatlarǵa názer awdaratuǵın bolsaq, 2017-jılı Qaraqalpaqstan Respublikasında ulıwma 318 mektepke shekemgi bilimlendiriw shólkemi bolıp, usı jastaǵı balalardı qamtıw kólemi 27,6 procentti quraǵan edi. Al, búgingi kúnde elimizde jumıs alıp barıp atırǵan balalar baqshalarınıń sanı 1574 ke, mektepke shekemgi bilimlendiriw jasındaǵı balalardı qamtıw kórsetkishi bolsa 76,7 procentke jetti. Bul, álbette, elimizde usı tarawda ámelge asırılıp atırǵan reformalardıń ámeliy nátiyjeleri bolıp tabıladı.

Mektepke shekemgi bilimlendiriw shólkemlerin qánige tárbiyashı hám pedagoglar menen támiyinlew, kadrlar tayarlaw sapasın arttırıw boyınsha da kólemli jumıslar ámelge asırılmaqta.

Bir ǵana institut mısalında alıp qaraytuǵın bolsaq, Mektepke shekemgi tálim fakulteti óz aldına fakultet sıpatında dúzilip, búgingi kúnde bul jerde tájiriybeli professor-oqıtıwshılar jaslarǵa ilimiy-pedagogikalıq baǵdarda tálim-tárbiya berip kelmekte.

Fakultette 900 dan aslam studentler bilim alıp atırǵan bolıp, olardıń oqıw procesi «4+2» sisteması boyınsha oqıw hám ámeliyattıń óz ara úylesimliligi tiykarında shólkemlestirilmekte.

Búgingi kúnde institutta Malayziyanıń Lincoln University College oqıw ornı menen mektepke shekemgi tálim baǵdarı boyınsha qospa tálim – Double Degree baǵdarlaması óz jumısın alıp barıp atırǵan bolıp, bunda studentler hám Ózbekstan, hám Malayziyanıń bilimlendiriw sisteması tiykarında óz bilim jáne kónlikpelerin arttıradı.

Sonday-aq, institut janında jańadan 90 orınǵa mólsherlengen mektepke shekemgi bilimlendiriw shólkemi qurılmaqta. Aldaǵı waqıtları institut janınan usı taraw boyınsha qánigeligin jetilistiriw orayın shólkemlestiriw arqalı klasster sistemasın payda etiw jobalastırılmaqta.

Instituttıń Mektepke shekemgi tálim kafedrası Qaraqalpaqstannıń barlıq qala hám rayonlarındaǵı balalar baqshalarında óziniń filialların shólkemlestirip, ol jerlerde tárbiyashı-pedagoglardıń tájiriybesin arttırıw, qánigeligin jetilistiriw baǵdarındaǵı jumıslar alıp barılmaqta.

Konferenciyada ministr G.Baxieva, Mektepke shekemgi tálim fakulteti dekanı M.Allambergenova, professor Q.Qoshanov, Mektepke shekemgi tálim kafedrasınıń baslıǵı, docent G.Jumashevalar bayanat jasadı.

Ilajda búgingi kúnde tarawda orın alıp atırǵan ayırım mashqalalar da atap ótildi. Házirgi waqıtta balalar baqshaları tárbiyashılarınıń qánigeligin jetilistiriw, jumıs procesinde paydalanıwı ushın qaraqalpaq tilindegi oqıw hám metodikalıq qollanbalar jetispewshiligi seziledi. Sonıń menen birge, baqshalarda kadrlar máseleleri menen baylanıslı mashqalalar da ushıraspaqta. Usınday mashqalalardı sheshiw maqsetinde ministrlik hám instituttıń óz ara birge islesiw máselesi ortaǵa taslanıp, aldaǵı waqıtta birgelikte ámelge asırılatuǵın jumıslar belgilep alındı.

Konferenciya óz jumısın sekciyalarda dawam ettirdi.

NMPI baspasóz xızmeti.