Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikasına miyneti sińgen ilim ǵayratkeri, xalıq bilimlendiriw aǵlası, filologiya ilimleriniń doktorı, professor Yuldash Ibragimovtıń tuwılǵanınıń 80 jıllıǵı múnásibeti menen «Globallasıw dáwirinde túrkiy dialektologiyanıń áhmiyetli mashqalaları» atamasındaǵı xalıqaralıq ilimiy-ámeliy konferenciya bolıp ótti.

Ilaj alımnıń ilimiy-pedagogikalıq miynetleri, monografiya, sabaqlıq, oqıw hám metodikalıq qollanbaları, jurnallarda hám konferenciya toplamlarında jarıq kórgen ilimiy maqalalarınan dúzilgen kórgizbe menen baslandı.

Konferenciyanı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ilajda Áliysher Nawayı atındaǵı Tashkent mámleketlik ózbek tili hám ádebiyatı universiteti ózbek til bilimi kafedrası professorı S.Ashirbaev, Qaraqalpaq mámleketlik universiteti qaraqalpaq til bilimi kafedrasınıń professorı Sh.Abdinazimov, Nókis mámleketlik pedagogikalıq institutı ózbek tili kafedrasınıń docenti G.Qurbaniyazov, Qazaq tili hám ádebiyatı kafedrasınıń baslıǵı, docent Í.Quttımuratova hám basqalar ilimpazdıń ómiri hám ilimiy-izertlew jumıslarınıń áhmiyetine baǵıshlanǵan bayanatların oqıp berdi.

Yu.Ibragimov xalıqtıń awızeki sóylew tili, onıń ádebiy tilden ózgeshelik tárepleri, ásirese, Xojeli hám Qońırat rayonları aymaqlarında jasaytuǵın ózbek sóylesimindegi ózine tán ózgesheliklerdi anıqlaw maqsetinde ilimiy-izertlew jumısların alıp bardı. Ol Qubla Aralboyı ózbek sóylemlerin lingvogeografiyalıq aspektte analizlegen, onıń dialektologiyalıq kartasın jaratqan dáslepki ilimpaz bolıp esaplanadı.

Ol óz ómirin dialektologiya, ózbek lingvistikalıq geografiyası hám areal lingvistikası tarawında ilimiy-izertlew jumısların alıp barıwǵa baǵıshladı. Yu.Ibragimovtıń doktorlıq dissertaciyası Aralboyında jasaǵan ózbek qıpshaqları dialektleriniń ózine tán ózgesheliklerin ilimiy jámiyetshilikke keńnen tanıtqan áhmiyetli izertlew jumısı bolıp tabıladı.

Alımnıń kóplegen kitapları, ilimiy, ádebiy-sın maqalaları, recenziyaları, ilimiy bayanatları ózbek lingvistikasına, sonıń ishinde, ózbek dialektologiyasına ózine tán úles qostı.

Konferenciyada professordıń kásiplesleri, dosları, shákirtleri, jaqınları sózge shıǵıp, alımnıń 80 jıllıq yubileyi menen qutlıqladı hám ilimiy-pedagogikalıq jumıslarında bekkem kúsh-ǵayrat tiledi.

NMPI baspasóz xızmeti.