Ájiniyaz atındaǵı Nókis mámleketlik pedagogikalıq institutı Shet tilleri fakulteti inglis tili hám ádebiyatı tálim baǵdarınıń 4-kurs studenti Kórkem Jalǵasova studentler almasıwı baǵdarlaması boyınsha Slovakiyanıń abıroylı joqarı oqıw orınlarınıń biri bolǵan Preshov universitetinde oqıwın dawam ettirmekte.

Ol bul imkaniyattı Slovakiya milliy grantlar baǵdarlamasına qatnasıp, jeńimpaz bolıwı nátiyjesinde qolǵa kirgizdi.

Xalıqaralıq studentlerdi hár tárepleme qollap-quwatlaw, olar menen birge islesiw maqsetinde islep shıǵılǵan bul baǵdarlama tiykarında dúnyanıń Italiya, Germaniya, Túrkiya, Polsha, Ispaniya, Franciya hám t.b. mámleketlerinen studentler usı universitette oqıp bilim almaqta.

NMPI studenti Kórkem Jalǵasova universitette til bilimi, dilmashlıq, inglis tili hám ádebiyatı baǵdarları boyın bilimlerin jetilistiriw menen birge ótkerilip atırǵan pán aylıqları hám konferenciyalarǵa belsene qatnaspaqta.

– Sabaqlar AQSh hám Britaniyadan kelgen professorlar tárepinen alıp barılmaqta. Hár kúni kitapxanaǵa baraman. Ol jerde sırt el ádebiyatları oǵada kóp. Usı jerde otırıp berilgen tapsırmalardı orınlap baraman. Bos waqıtlarımızda Erasmus + joybarı tiykarında studentler menen óz ara sáwbetlesiwler alıp baramız, bilim hám tájiriybelerimizdi almasamız. Sırt elde oqıwdı kishkene waqtımnan niyet etetuǵın edim. Sonlıqtan, aldıma sonı maqset etip qoyıp, soǵan qaray háreket ettim, — deydi Kórkem Jalǵasova biz benen sáwbette. – Barlıq qaraqalpaq jaslarınıń da usınday sırt ellerde oqıwın, bilimin jetilistirip, elimiz rawajlanıwına úles qosıwın qáleymen hám usınday tileklerdi barlıq jaslarǵa tilep qalaman.

Biz de institutımız studentiniń erisip atırǵan nátiyjelerin kórip úlken quwanıshqa bólendik. Kórkem Jalǵasovaǵa aldaǵı oqıwlarında tabıslar tilep qalamız.

NMPI baspasóz xızmeti.