Ájiniyaz atındaǵı Nókis mámleketlik pedagogikalıq institutında Túrkiy tiller fakulteti qaraqalpaq ádebiyatı kafedrası tárepinen qaraqalpaq ádebiyatınıń klassik shayırı Berdaq Ǵarǵabay ulınıń 195 jıllıǵına arnalǵan «Berdaq edi shayırlardıń danası» atamasındaǵı ilimiy-teoriyalıq konferenciya shólkemlestirildi.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Konferenciyada filologiya ilimleri boyınsha filosofiya doktorı (PhD) Q.Mámbetov «Berdaq dóretiwshiliginde diniy uǵımlar», qaraqalpaq ádebiyatı kafedrasınıń doktorantı Q.Sársenbaev «Berdaq dóretiwshiliginiń házirgi dáwirde úyreniliwi», magistrant G.Jumamuratova «Berdaq dóretiwshiliginiń izertleniwi» atamalarındaǵı bayanatların oqıp berdi.

Xabarıńız bar, elimizde 27-noyabr sánesi klassik shayır, óz qosıqlarında bárqulla xalıqtıń ǵam-táshwishlerin jırlaǵan, baxıtlı turmıstı árman etken ullı sóz sezgeri Berdaq (Berdimurat) Ǵarǵabay ulı dúnyaǵa kelgen kún sıpatında keń túrde belgilenedi.

Qaraqalpaq ádebiyatında Berdaqtıń shıǵarmaları tereń filosofiya hám didaktikalıq mazmunǵa iye ekenligi menen ózgeshelenip, jaslar tárbiyasında úlken áhmiyetke bolıp esaplanadı.

Berdaq ózi jasaǵan zamandaǵı xalıqtıń kúndelikli turmısı, jasaw sharayatları haqqında haqıyqıy kartinanı jaratıp beretuǵın qosıqlar, poeziyalıq shıǵarmalar dóretti.

Onıń shıǵarmaların izertlew boyınsha usı kúnge shekem N.Dáwqaraev, Á.Paxradinov, I.Saǵıytov hám basqa da kórnekli ilimpazlar ilimiy jumıslar alıp barǵan bolsa, búgingi kúnde de doktorantura hám magistratura basqıshlarında oqıp atırǵan ilimiy izleniwshiler bul baǵdardaǵı jumıslardı dawam ettirmekte.

Ilajda Berdaq shıǵarmaların úyreniwdiń áhmiyeti, bul boyınsha orın alıp atırǵan mashqalalar, onıń poeziyasın xalqımız, ásirese, jaslar arasında keń úgit-násiyatlaw boyınsha ámelge asırılıwı zárúr bolǵan jumıslar boyınsha pikir almasıldı.

NMPI baspasóz xızmeti.