Ájiniyaz atındaǵı Nókis mámleketlik pedagogikalıq institutınıń barlıq fakultetleri kesiminde ashıq esikler kúni ilajları hám studentlerdiń ata-anaları menen ushırasıwlar ótkerilmekte.

Pedagogika fakultetinde bolıp ótken usınday ilajda fakultet studentleriniń qolǵa kirgizip atırǵan nátiyjeleri sáwlelengen kórgizbe ata-analardıń názerine usınıldı.

Ilaj sheńberinde olar menen sáwbetlesiwler ótkerildi.

Instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov, fakultet dekanı Sh.Saparovlar studentlerdiń oqıwı, ilim-bilim sırların meńgeriwi, qábiletlerin júzege shıǵarıwı ushın jaratılǵan sharayatlar, student-jaslardıń erisken tabısları haqqında maǵlıwmatlar berdi.

Házirgi waqıtta fakultet quramında muzıkalıq tálim, pedagogika, psixologiya kafedraları jumıs alıp barmaqta. Muzıkalıq tálim, pedagogika hám psixologiya, sonday-aq, mektep menedjmenti tálim baǵdarlarında oqıp atırǵan jaslarǵa 3 professor, 2 ilim doktorı, 17 ilim kandidatı – ulıwma 67 professor-oqıtıwshı bilim berip kelmekte. Olar arasında professor Ó.Álewov «Fidokorona xizmatlari uchun», docent A.Nadırova «Doslıq» ordenleriniń iyesi, professor D.Allanazarov «Qaraqalpaqstanǵa xızmet kórsetken kórkem óner ǵayratkeri» húrmetli ataǵı, docent A.Dáwekeeva «Jıl hayalı» respublikalıq tańlawında «Jıldıń belsendi ilimpaz hayalı» nominaciyasınıń jeńimpazı boldı.

Usınday joqarı potencialǵa iye bolǵan ustazlar qolında tálim-tárbiya alıp atırǵan studentler joqarı nátiyjelerdi qolǵa kirgizip kelmekte.

Atap aytqanda, búgingi kúnge shekem fakultet studentleri arasınan 3 student «Nihol» mámleketlik sıylıǵı, 2 student Zulfiya atındaǵı mámleketlik sıylıǵı, 50 den aslam jaslar respublikalıq hám xalıqaralıq tańlawlardıń jeńimpazları, sonıń menen birge, Nawayı, Ibrayım Yusupov, Ájiniyaz Qosıbay ulı atındaǵı mámleketlik stipendiyalar tańlawlarınıń jáne «Jıl studenti» tańlawınıń institut basqıshı jeńimpazları shıqtı.

Ushırasıwda ata-analar menen jaslar tárbiyası, olardıń áhmiyetli baǵdarları, orın alıp atırǵan mashqalalı jaǵdaylar haqqında pikir almasıldı hám aldaǵı waqıtlarda birgelikte ámelge asırılatuǵın jumıslar belgilep alındı.

Ilajda ata-analar tólemli kontrakt boyınsha jeńillikler, ijarada jasaytuǵın studentlerdiń ijara tólemleri, studentlerge qosımsha ústeme stipendiyalar beriw máseleleri boyınsha ózleriniń qızıqtırǵan sorawlarına juwaplar aldı.

Ushırasıw dawamında oqıwda hám jámiyetlik jumıslarda belsendilik kórsetip, tańlawlar jáne jarıslarda jaqsı kórsetkishlerge erisip kiyatırǵan bir topar studentler hám olardıń ata-anaları alǵısnamalar jáne estelik sawǵaları tapsırıldı.

Óz gezeginde, studentlerdiń ata-anaları institut hám fakultet jámáátine jaslar tálim-tárbiyasına qaratıp atırǵan usınday itibarı jáne ǵamqorlıqları ushın minnetdarlıǵın bildirdi.

NMPI baspasóz xızmeti.