Ájiniyaz atındaǵı Nókis mámleketlik pedagogikalıq institutında Ózbekstan Respublikası Ministrler Kabineti janındaǵı Bilimlendiriw sapasın qadaǵalaw mámleketlik inspekciyasınıń jumısshı toparı aǵzaları qatnasıwında ushırasıw bolıp ótti.

Ushırasıwda mámleketlik inspekciyanıń Joqarı bilimlendiriw hám joqarı oqıw ornınan keyingi bilimlendiriw mákemelerin attestaciyadan ótkeriw bóliminiń baslıǵı R.Ruzmetov, Ulıwma orta hám mektepten tıs bilimlendiriw mákemelerin attestaciyadan ótkeriw bóliminiń baslıǵı R.Ergashev, inspekciyanıń Qaraqalpaqstan Respublikası aymaqlıq bólimi baslıǵı I.Qunnazarov, Qaraqalpaqstan Respublikası Xalıq bilimlendiriw ministri A.Narımbetov, Mektepke shekemgi bilimlendiriw ministri G.Baxieva hám usı ministrliklerdiń juwaplı xızmetkerleri, sonday-aq, institut basshıları, fakultet dekanları, bólimler hám kafedralardıń baslıqları qatnastı.

Ilajda Ózbekstan Respublikası Prezidentiniń 2022-jıl 21-iyundaǵı «Pedagogikalıq bilimlendiriw sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları haqqında»ǵı qararında belgilep berilgen wazıypalardan kelip shıǵıp ámelge asırılıp atırǵan jumıslar dodalandı.

Jumısshı topar tárepinen pedagog kadrlar tayarlaytuǵın joqarı bilimlendiriw mákemelerin sistemalı rawajlandırıw hám olarda basqarıw jumısların jetilistiriw, aldınǵı sırt el tájiriybelerin engizgen halda zamanagóy bilimlendiriw baǵdarlamaların islep shıǵıw, joqarı tájiriybeli professional kadrlar tayarlawdı jańa basqıshqa kóteriw, sonday-aq, tarawda bilimlendiriw, ilim hám ámeliyattıń birligin támiyinlew baǵdarında ámelge asırılıp atırǵan jumıslar boyınsha eki kúnlik úyreniw jumısları alıp barılıwı atap ótildi.

Eki kún dawam etetuǵın bul ilajda Qaraqalpaqstan Respublikasında jumıs alıp barıp atırǵan ulıwma orta bilim beriw mektepleri jáne pedagog kadrlar tayarlaytuǵın pedagogikalıq institutta joqarıda atap ótilgen wazıypalardıń orınlanıwı hám usı jumıslardı aldaǵı waqıtları bunnan bılay da jetilistiriwge baǵdarlanǵan wazıypalardı belgilep alıw maqset etip belgilengen.

NMPI baspasóz xızmeti.